Sámediggi doallá jahkásaš konferánssa gielddaiguin ja fylkkagielddaiguin duorastaga 4. ja bearjadaga 5. b. geassemánus 2009 Kárášjogas. Várrepresideanta Marianne Balto háliida čalmmustahttit finánsaroasu ja dan váikkuhusat sámi guovlluid ealáhuseallimii. Balto doaivu ahte konferánsas boahtá ovdan ahte mo rievdadusat globála ekonomiijas čuhcet smávit báikegottiide sámis. Konferánsa maid galggašii geahčadit vejolaš strategiijaid dustet dáid hástalusaid.
Konferánssa fáttát lea earret eará:
- Mo lassi árvoháhkan gielddain sáhttá dustet daid hástalusaid maid finánsaroassu buktá?
- Hástalusat mat leat guollevuostáiváldirusttegiin go leat gitta ja mo dát váikkuhit guolásteddjiide
- Sámi mátkefitnodagat ja globála rievdadeamit
- Ealáhusovddidanbargguid boahtteáigi Finnmárkkus
- Mo sámi árbediehtu sáhttá čatnot ealáhusovdáneapmái
- Árvoháhkanvejolašvuođat máttasámi guovlluin