- Nuortasámi musea duohtan dahkan proseassa lea leamaš guhkki ja rašši. Danne illudahttá hui sakka go Ráđđehus dál evttoha addit opmodaga ja vistti nuvttá Deanu ja Várjjat museasiidii, dadjá ráđđelahttu Hilde Anita Nyvoll. Dát álkiduhttá proseassa musea eaiggátvuođa sirdimis.
Deanu ja Várjjat museasiida vuođđuduvvui árat dán jagi ja das lea ovddasvástádus sámi museadoaimmas Deanus ja Várjjagis. Nuortasámi musea lea fargga gárvvis sisafárremii. Musea rahppojuvvo almmolaččat dalle go čájáhusbargguin leat geargan.
Sámediggi oažžu ruđaid maiddái dákteriggeávdnasiid, mat váldojuvvojedje Njávdámis 1915:s buktimii ruovttoluotta. Ruđat váikkuhit positiivvalaččat St. Georg kapealla hávdádansaji ja nuortasámi historjjá ektui nuortasámi gilis.
- Dat doaibmabijut leat mielde buhttemin boares eahperievtti nuortasámiid vuostá. Dat lea deaŧalaš lávki nuortasámiid vuoigatvuođaid ja kultuvrra sihkkarastimis, dadjá Nyvoll loahpas.