-Mun lean hui ilus go leat gávdnan čovdosa dán váttis áššái, lohka Egil Olli. Son lohká guktui beliid šiehtadallan dainna ulbmilin ahte ođđa oahppaneavvut eai galgga maŋŋonit. Olli lohká dán šiehtadusa sihkkarastit nuvttá oahppaneavvuid sámi ohppiide boahtteáigái.
Sámedikke ráđđi Jørn Are Gaski jođihii šiehtadallamiid lágádusaid ja sámedikki gaskka. Dál lohká Gaski boahtteáigge hástalussan dahkat šiehtadusa lágádusaiguin vai oahppogirje ráhkaduvvojit áiggil.
-Mun lean erenoamáš duhtavaš go mii leat ovttas gávdnan buori vuođu šiehtadallat boahtteáiggis. Mii háliidit buori oktavuođa daiguin geat ráhkadit oahppogirjjiid ja min ulbmil leat ráhkadit bistevaš šiehtadusa Sálas servviin mii ovddasta lágádusaid, deattuha Gaski.
Šiehtadallamat Sámedikki ja Sálas gaskka jotkojuvvojit čielggadandihti vissis beliid nuvttá oahpponeavvo sáddenortnegis. Dasa lassin jotkojuvvojit hálešteamit mat galget čielggadit guhkitáigge oktavuođa Sámedikki ja lágádusaid gaskka. Ulbmilin lea ráhkadit fásta oastinortnega ja lágádusšiehtadusa sámi lágádusaiguin, čilge Gaski.
Šiehtadus mii čállui bearjadaga maiddái mearkkaša ahte Sámedikki 2009 bušeahtta oahpponeavvuide ii stuoro.