2009:s lea 20 jagi áigi go ON:a konvenšuvdna mánáid vuoigatvuođaide mearriduvvui. Mánáidkonvenšuvdna dohkkehuvvui Norggas 1991:s, ja váldui mielde norgga riektái 2003:s. Dán oktavuođas áigu Sámediggi lágidit seminára mánáidkonvenšuvnna birra Sámediggeáirasiidda ja earáide geat beroštit gullat. Seminára mánáidkonvenšuvnna birra álgá dii. 15.00 rájes gaskavahku 27. b. dii. 12.00 rádjái duorastaga 28. b.
Sámediggeráđđi lea leamaš nu fidnár go lea ožžon Professora Dr. Juris Lucy Smith, geas lea eanemus gelbbolašvuohta Mánáidkonvenšuvnna birra, juogadit iežas máhtu dán áššis. Professora Lucy Smith lea ON:a mánáidkomitea mielláhttu, dan son lea leamaš 2003 rájis.
- Dán semináras háliidit mii bidjat fokusa sámi mánáide, sin árgabeaivái ja sin vuoigatvuođaide. Sámi mánáin lea erenoamáš dárbu beassat ovddidit iežaset giela, kultuvrra, identitehta ja gullevašvuođa sápmái, lohká Gaski.
- Dán čájehit mii semináras dainna vugiin ahte diktit mánáid jiena maid gullot oassálastima, dáidaga ja kulturdoaimmaid bokte. Sámediggi áŋgiruššá ásahit buriid ja bissovaš bajásšaddaneavttuid sámi mánáide ja nuoraide, ja dán barggus leat Mánáidkonvenšuvnna mearrádusat guovddážis, lohka Gaski.