Arkiivaávdnasiin mat leat váldojuvvon duottarguovlluin Opplánddas gávdnojit ollu kulturmuittut mat sáhttet leat boastut dulkojuvvon norrøna ja norgalaš kulturdovdomearkan. Ođđa dutkan lea addán máhtolašvuođa das ahte sámit leat dolin ássan rádjaguovlluin nuortabealde (Hedmárku) go maid ovdal leat jáhkkán, ja čálalaš gálduin leat oaidnán ahte sámit leat leamaš Opplanddas.
Opplandda fylkkagielda áigu, Sámedikki fápmudusa mielde, administeret dađistaga sámi kulturmuittuid areálahálddašeami Opplánddas. Sámediggái dieđihuvvo buot ođđa kulturmuitoregisteremiid ja áššiid birra main sáhttet šaddat vejolaš vuostálasvuođat. Sámedikkis lea dattetge ain bajimuš ovddasvástádus sámi kulturmuittuin Opplanddas.
Šiehtadus lea dál gárvvis vuolláičállima várás. Dat dahkkojuvvo Sámedikki dievasčoahkkima oktavuođas Kárášjogas duorastaga 28.05.09. Vuolláičállima oktavuođas dollojuvvo miniseminára dievasčoahkkinsálas man fáddán lea: Sámi dološ áigi Mátta-Norggas. Sávvat buresboahtima pressii dán miniseminárii. Prográmma lea čuovvovaš:
- 17:00-18:00: Seminára dievasčoahkkinsálas. Fáddá: Sámi dološ áigi Mátta-Norggas.
- 17:00-17:03: Sámedikki presideanta Egil Olli sávvá buresboahtima.
- 17:03-17:06: Dearvvuođat fylkkasátnejođiheaddji Audun Tron bokte.
- 17:06-17:15: Arkeologa Espen Finstad, Opplandda fylkkagielda: Sámi kulturmuitobarggu birra Opplanddas.
- 17:15-17:45: Dutki Jostein Bergstøl, Kulturhistorjjálaš musea: Etnálaš proseassat, máttasámiid ja norrøna servodaga gaskka. Ođđa gávdnosat ja ođđa dulkomat.
- 17:45-18:00: Gažaldagat
Máŋŋá seminára vuolláičálliba Sámedikki presideanta Egil Olli ja Opplandda fylkkasátnejođiheaddji, Audun Tron, ovttasbargošiehtadusa kulturmuittuin. Dan oktavuođas dollojuvvo preassakonferánsa lanjas 121 diibmu 18:15.