Sámediggeráđis lea leamaš buorre gulahallan suohkaniin dan birra ahte láhččojuvvo buori fálaldahkii sámegielas. Ráđđelahttu Jørn Are Gaski (BB) deaivvai mannan vahku mánáid ja nuoraid váldolávdegotti Álttás, ja Gaski ja Nyvoll leaba doallan čoahkkima sátnejođiheaddjiin Bakkeniin árat dán giđa.
Nyvoll čujuha dasa ahte Sámediggi oččoda bajiduvvot refušuvdnamáksomeriid sámegieloahpahusas ja ahte Sámediggi bargá ovttas Gielddaid Guovddášlihtuin (GG:in) ráhkadit buoret rámmaeavttuid skuvllaid sámegieloahpahussii. Dát boahtá maiddái Álttá suohkanii buorrin, deattuha Nyvoll.
Hástalussan ovddosguvlui lea earret eará fidnet eanet sámegielat oahpaheaddjiid, vai suohkan sáhttá addit buori oahpahusfálaldaga ohppiide. Nyvolla oaivila mielde lea lunddolaš ahte Sámi allaskuvla ja Finnmárkku allaskuvla barget ovttas dáinna. Álttá giellaguovddáš sáhttá maid veahkehit bajidit daid oahpaheaddjiid ja váhnemiid gelbbolašvuođa geat háliidit oahppat sámegiela.
-Mii sávvat Álttá suohkanii lihku ovttajienalaš mearrádusain ja rámidit suohkana go dat áigu áŋgiruššat viidáseappot buriin sámi skuvlafálaldagain, dadjá sámediggeráđđi Hilde Anita Nyvoll (BB).
sámediggeráđđi Hilde Anita Nyvoll
Tlf: +47 918 07 130