KS- Finnmárku cealkámušas čujuhuvvo dasa ahte refušuvdnamáksomearit sámi giela ovddas vuođđoskuvllas leat unnibut go duohta golut. Meroštusat maid suohkanat Finnmárkkus leat dahkan, čájehit ahte dušše bealli duohta goluin gokčojuvvo stáhta refušuvdnamáksomeriid bokte. Konferánsa bivdá ahte doarjjaortnegat sámi gillii nannejuvvojit stáhtabušeahta bokte vai duohta golut gokčojuvvojit.
Dát čájeha ahte KS lea dehálaš ovttasbargoguoibmi Sámediggái boahtteáiggis, oaivvilda Gaski. Son čájeha dasa ahte BB guhkit áiggi lea sávvan lagat ovttasbarggu KS:ain, muhto ii leat olahan dan Sámedikki ovddit ráđđehusaid vuolde.
-Mis leat seamma beroštumit máŋgga áššis. KS lea ovttamielas minguin áššis mii guoská buoret ruhtadandárbui sámi oahpahusas skuvllain. Mun maid bijan fuomášupmái ahte KS- Finnmárkku deattuha ahte lea našuvnnalaš beroštumis ahte olbmuin lea buorre fálaldat sámegielas ja - gillii, dadjá Gaski.
Sámediggeráđđi lea čoahkkimiiguin Oahpahusdirektoráhtain ja Máhttodepartemeanttain digaštallan refušuvdnamáksomeriid sámi oahpahusa ovddas vuođđoskuvllas. Meroštusat čájehit ahte dušše goalmmádasoassi oahpahusgoluin gokčojuvvo otná refušuvdnaortnega bokte. Ráđđi lea bivdán ahte dát rievdá nu ahte duohta golut gokčojuvvojit.
Gaski čujuha ahte KS- Finnmárku maid dál geige dán gáibádusa. Son vuordá dál ahte Oahpahusdirektoráhta evalueren refušuvdnaortnegis buktá dan bohtosa ahte suohkanat ožžot gokčojuvvot ollásit iežaset olggosgoluid.
-Jus mii háliidit ahte sámegiella galgá ceavzit ja ovdánit boahtteáiggis, de mii fertet háhkat buriid rámmaeavttuid skuvllaid oahpahussii, deattuha Sámediggeráđi Jørn Are Gaski (AP).
Sámediggeráđđi Jørn Are Gaski
Tlf 922 20 598