Válgakoarttas leat dieđut dan birra guđe válgalokálas galggat fitnat jienasteamen válgabeaivvi vai fertet go dán jagi ovdagihtii jienastit, ja gosa jienastat galgá sáddejuvvot.
Sámediggeválgakoarta lea alit. Sii, geain lea jienastanvuoigatvuohta Stuorradiggeválggain ožžot dasa lassin vilges válgakoartta. Dalle lea vejolaš jienastit goappašiin válggain.
Ođas dán jagi válggain lea dat, ahte gielddain main ledje unnit go 30:s registrerejuvvon Sámedikki jienastuslogus 2005:s, FERTEJIT olbmot ovdagihtii jienastit. Dain gielddain ii leat válgadiggi Sámediggeválggaid várás. Geahča čuovvovaš liŋkkas guđe gielddain ii leat válgadiggi:
http://www.sametinget.no/Artikkel.aspx?AId=2908&back=1&MId1=1&MId2=1707&MId3=2943&
Don sáhtát jienastit ovdagihtii buot gielddain Norggas. Dieđusge sáhtát jienastit maid du iežat ruovttugielddas. Ovdagihtii jienasteapmi sisriikkas álggahuvvo 10.08.2009. Don sáhtát ovdagihtii jienastit gitta bearjadahkii ovdal válgga, muhto dus lea ovddasvástádus jienastit nu árrat ahte jienastat joavdá válgadiggái ovdal vuossárgga14.09.2009 dii. 21.
Váldde mielde válgakoartta go áiggut jienastit. Dát álkiduhttá válgadoaimmaheddjiid barggu ja beasat jienastit johtileappot. Don beasat dattetge jienastit vaikko livččet ge vajálduhttán dahje massán válgakoartta. Gielddain lea vejolašvuohta čállit ođđa válgakoartta iežaset vuogádagas, dahje deavdit koartta gieđain. Váldde oktavuođa Sámediggái jos it leat ožžon sámediggeválgakoartta poasttas ja oaivvildat ahte leat čálihuvvon Sámedikki jienastuslohkui.
Válgakoarta ii dohkke persovdnaduođaštussan. Dus ferte leat gustovaš persovdnaduođaštus vel mielde.
Váldde oktavuođa Sámediggái jos dus leat gažaldagat válgakoartta birra.