Gielddat almmuhit jienastanbáikkiid rabasáiggiid ja mearridit gos lea válgadiggi Sámediggeválgii jienasteami várás.
Buot gielddain Norggas galgá leat vejolaš ovdagihtii jienastit seamma báikkiin go stuorradiggeválgii. Šiehtadusa mielde gielddaiguin rahppojuvvo vejolašvuohta jienastit ovdagihtii suoidnemánu 1. b. rájes. Dát guoská erenoamážit sidjiide geat dihtet ahte sis ii leat vejolašvuohta jienastit dábálaš ovdagihtii jienastanáigodagas.
Válgadiggi
Don sáhtát jienastit dušše dan gieldda válgadikkis gos leat álbmotregistaris ja dušše dain gielddain Norggas gos leat badjel 30:s registrerejuvvon Sámedikki jienastuslogus 2005 ektui. Dan 47 guoskevaš gielddas lea válgadiggi vuossárgga 14.09.2009. Dain gielddain gos lea mearriduvvon guovtti beaivásaš válgadiggi, lea lassin sotnabeaivi 13.09.2009, ja dat guoská maiddái Sámediggeválgii. Jagi 2009 Sámediggeválggas guoská dát 47 gildii Norggas:
ÁLTÁ, BÁHCCAVUOTNA, BERGEN, BÅDÅDDJO, BÆRUM, EVENÁŠŠI, FUOSSKU, GÁŊGAVIIKA, GÁLA, RIVTTÁK, HAMMARFEASTA, HARSTAD, ÁKŊOLUOKTA, HEMNES, KÁRÁŠJOHKA, GUOVDAGEAIDNU, FÁLESNUORRI, NÁVUOTNA, GÁIVUOTNA, LOABÁT, DAVVESIIDA, LEAŊGAVIIKA, LÁHPPI, IVGU, MÁLATVUOPMI, MUOSÁT, NARVIIKA, DAVVENJÁRGA, RÁISÁ, OSLO, PORSÁŊGU, RUOVAT, RØROS, RØYRVIK, SKIERVÁ, SKÁNIK, SNÅASE, SUORTA, OMASVUOTNA, ORJJEŠ-RÁISÁ, MÁTTA-VÁRJJAT, DEATNU, ROMSA, TROANDIN, DIVTASVUOTNA, UNJÁRGA ja ČÁHCESUOLU.
Jos du gielda ii leat dáid gaskkas, de fertet jienastit ovdagihtii. Maiddái válgakoarttas oidno lea go dus vejolašvuohta jienastit válgabeaivvi, vai fertet go ovdagihtii jienastit.
Ovdagihtii jienasteapmi sisriikkas
Don sáhtát ovdagihtii jienastit buot gielddain Norggas. Ovdagihtii jienasteapmi álggahuvvo 10.08.2009 sisriikkas ja bistá maŋimuš bearjadahkii ovdal válgga, gitta 11.09.2009 rádjai. Dattetge lea jienasteaddji ovddasvástádus jienastit nu árrat ahte jienastat joavdá jietnalohkanbáikái ovdal vuossárgga 14.09.2009 dii. 21. Válgakoarttas oidno gosa jienastat galgá sáddejuvvot.
Ovdagihtii jienasteapmi Svalbarddas, Jan Mayenis ja olgoriikkain
Ovdagihtii jienasteapmi álggahuvvo suoidnemánu 1. b. olgoriikkain, Svalbarddas ja Jan Mayenis. Svalbarddas ja Jan Mayenis loahpahuvvo ovdagihtii jienasteapmi maŋimuš bearjadaga ovdal válgga. Olgoriikkain loahpahuvvo ovdagihtii jienasteapmi nubbin maŋimuš bearjadaga ovdal válgabeaivvi.