Departemeanta ja Sámediggi leat ovttasbargan lahkalagaid doaibmaprográmma ovddidemiin. Máŋgga konsultašuvnna bokte sihke hálddahuslaš dásis ja politihkalaš dásis lea ráhkaduvvon prográmma mii čalmmustahttá sámegiela oahpahusa, geavaheami ja oainnusin dahkama.
Sámediggeráđđi ja várrepresideanta Marianne Balto (BB) čujuha dasa ahte buot sámegielat leat áitojuvvon. Máttasámegiella ja julevsámegiella leat eanemusat áitojuvvon ja dain leat uhcimus geavaheaddjit. Davvisámegiela, maid eatnašat geavahit, dilli lea veaháš buoret, muhto maiddái dan dilli lea váttis. Daid skuvlaoahppiid lohku, geat ohppet sámegiela vuosttašgiellan, lea njiedjamin ja buohkanassii leat uhcit ja uhcit oahppit geain lea sámegieloahpahus vuođđoskuvllas.
-Doaibmaprográmma galgá bistit 5 jagi ja mihttomearrin lea jorgalahttit dán soju. Prográmma čađaheami áiggi galget doaibmabijut árvvoštallojuvvot, bohtosat geahčaduvvot ja prográmma vejolaččat rievdaduvvot. Ođđa jahkásaš doaibmabijut árvvoštallojuvvojit dađistaga vai mii deaivat ulbmiljoavkkuid, dadjá Balto (BB).
Doaibmaplána geatnegahttá stáhta ásahusat vuhtiiváldit sámi gielalaš ja kultuvrralaš vuoigatvuođaid. Lea dehálaš addit sámegiela alit árvvu deattuha Balto.
Stáhtačálli Raimo Vallo dieđihii maiddái dárkkistit guovttegielalaš njuolggadusaid hálddahusas lea doaibmabidju doaibmaplánas. Departemeanta galgá árvvoštallat juolledemiid sihkkarastit ahte addet buriid bohtosiid. Sámediggi lea čađahan gulaskuddama suohkaniiguin mat ožžot giellajuolludemiid. Gulaskuddan čájeha dárbbu dárkkistit otná njuolggadusaid.