Sámedikki doarjjastivrra čoahkkimis Árbordes 03.-05.06.09 juolluduvvui oktiibuot 2 941 000 ru doarjja ealáhusdoaimmaide.
Juolludemiid oktavuođas háliida doarjjastivrra jođiheaddji Ann-Mari Thomassen (NSR) čalmmustahttit čuovvovaš doaimmaid:
Juolluduvvojedje ásahanstipeanddat oktiibuot 871 000 ruvnno ovddas ođđa doaimmaid ovddideapmái ja ođđa fitnodagaid ásaheapmái. Stipeanddat juolluduvvojedje ásaheddjiide geat áigot álggahit meahcceealáhusdoaimmaid ja smávitlágan biebmobuvttadeami. Doarjjastivrra jođiheaddji lea ilus go lotnolasealáhusaid árvoháhkanprográmma ja sámi mátkkoštusealáhus sáhttá váikkuhit ođđaásahemiide dain ealáhusain.
Mariidnaealáhussuorggis juolluduvvui oktiibuot 632 000 ru guolástusfatnasiid oastimii. Lassin juolluduvvui 1 438 000 ru doarjja iešguđetlágan ealáhusdoaimmaide eanandoalus, mátkkoštusealáhusas, duojis ja juohkelágan ealáhusain.
Stivračoahkkima oktavuođas lágiduvvui rabas álbmotčoahkkin Sitjie Njarges gos doarjjastivra muitalii Sámedikki doaimma ja iešguđet doarjjaortnegiid birra. Doarjjastivra finai maiddái Byrkije Kjøtt fitnodagas mii doaimmaha bierggu viidásetbuvttadeami, biebmoguossoheami, mátkkoštusealáhusa ja sámi kultuvrra gaskkusteami. Lotnolasealáhusaid árvoháhkanprográmma ja sámi mátkkoštusealáhusa hálddašeami oktavuođas lea dehálaš ahte doarjjastivra beassá deaivat aktevrraid geat leat lihkostuvvan ásahit iežaset fitnodaga, loahpaha doarjjastivrra jođiheaddji Ann-Mari Thomassen (NSR).