Ovdaprošeakta: Viester-Alas
29 000 ru doarjjan ovdaprošektii "Viester-Alas" mii lea dáiddaprošeakta Viestterálas olbmuid historjjá ja dáláš dili birra. Mielde leat prošeaktajođiheaddji Helle Storvik (govvadáiddár), Rune Johansen (govvideaddji/govvadáiddár) ja Mari Boine (musihkár).
Prošeakta: Dearvvašvuođa ovddideaddji ja dávdaeastadeaddji bargosadji
90 000 ru Tysfjord ASVO AS:ii "En helsefremmende og sykdomsforebyggende arbeidsplass, med positive ringvirkninger for lokalbefolkningen" nammasaš prošeavtta čađaheapmái. Doarjja lea addojuvvon investeremiidda ja dávviriid oastimii aktivitehtaguovddážii. Tysfjord ASVO lea maid ásahuvvon addit vejolašvuođaid sidjiide geat leat eret bargoeallimis oanehis áiggi dahje guhkes áiggi.
Prošeakta: Sámi kulturmearkkat muorain Anárjogas
15 000 ru Finnmárkku fylkkamanni prošektii "sámi kulturmearkkat muorain". Fylkkamanni lea čielggadeamen vejolašvuođaid viiddidit Anárjoga álbmotmeahci. Rukseslistašlájaid kártema oktavuođas 2008:s boares beahcevuovddis Basevuovddi- Goššjohleagi guovllus leat gávdnon sámi kulturmearkkat muorain nugo eaiggátmearkkat, háltemearkkat, guolmmastanmearkkat ja earálágan kulturmearkkat boares muorain. Ollu mearkkat leat máŋga čuođi jagi boarrásat ja muorat leat dieinna lágiin automáhtalaččat ráfáidahttojuvvon kulturmuitolága mielde. Prošeavttas boahtá raporta.
Museadoaimma ásaheapmi ja doaibma bihtánsámi guovllus
141 000 ru lassijuolludussan Árran julevsáme guovddážii museadoaimma ásaheapmái ja doibmii bihtánsámi guovllus Sámedikki dievasčoahkkima mearrádusa mielde áššis 06/07 Sámi museadoaimma oassečielggadus Davit Norlánddas ja Romssas.
Duoddará Ráffe/Bihtánsámi guovddáš: Guovddáža huksehusaide
450 000 ru Duoddará Ráffe/Bihtánsámi guovddážii guovddáža ođasmahttimii dan oktavuođas go Árran julevsáme guovddáš galgá ásahit bihtánsámi museadoaimma 2009:s.
Girjeprošeakta: Máttasámi jietnagirjji almmuheapmi mas mielde dasa gullevaš teakstagihpa mánáid ja nuoraid várás
189 000 ru jietnagirjelágádussii Selhornet AS doarjjan máttasámi jietnagirjji almmuheapmái mas lea mielde teakstagihpa mas leat unnimusat 25 teavstta. Prošeavtta olahusjoavkun leat mánát ja nuorat, muhto rávisolbmot sáhttet maid daid geavahit.
Girjeprošeakta: Gåebrien Sijte - Sámegili historjá Røros-guovlluin
300 000 ru Sverre Fjellheim girjeprošektii muhtun sámegili historjjá birra mas erenoamážit deattuhuvvojit vuostálasvuođat sámiid ja boanddaid gaskka Riasten-guovllus 1700-logu loahpa rájes gitta sullii jahkái 1940. Fjellheim lea earret eará gávdnan ođđa gáldoávdnasiid mat addet dieđuid deaŧalaš proseassaid birra gaskal 1880 ja 1930.
Dáid doarjagiid lea Sámediggeráđđi čoahkkimisttis Ráisas geassemánu 9.-11. b. 2009 juolludan.