- Mii leat hui duhtavaččat go sámi mánáidgárdefálaldat viiddiduvvo Álttás. Lea leamaš paradoksa go máŋga čuođi máná ožžot sámegielfálaldaga skuvllas, muhto nu moattis ožžot sullásaš sámi fálaldaga mánáidgárddis. Lea movttiidahtti ahte Álttá suohkan dál vuoruha maiddái daid smávimus mánáid. Sámediggi háliida dan dihte rámidit Álttá suohkana, dadjá ráđđelahttu Jørn Are Gaski.
Odne gávdnojit golmma mánáidgárddis giellajoavkkut Álttás, lassin priváhta sámi mánáidgárdái. Dálá sámi mánáidgárdefálaldagas eai leat leamaš doarvái sajit buot mánáide. Danne lea Sámi váhnenfierpmádat guhká bargan sámi mánáidgárdefálaldaga viiddidemiin.
- Sámediggeráđđi áigu joatkit bargat sámi fálaldaga ovddas mánáidgárddiin ja skuvllain ovttas Álttá suohkaniin. Das leat ain olu hástalusat, muhto mii leat duhtavaččat go Álttá suohkan lea manname rievttes guvlui, loahpaha Gaski.
Sámedikkis lea sierra doarjjaortnet sámi mánáidgárdefálaldagaid váste. Doarjjaortnet lea oaivvilduvvon sihke sámi mánáidgárddiide ja dáčča mánáidgárddiide gos leat sámegielat mánát. Álttá suohkana mánáidgárddit ožžot dán jagi 585 000 ru doarjaga Sámedikkis. Dat juolluduvvo Álttá siidii, Sandfallet luonddumánáidgárdái ja SiF mánáidgárdái. Álttá bearašmánáidgárdi oaččui 62 500 ru doarjaga 2008:s. Jus Álttá suohkan vel ásaha sámi ossodaga Oterfaret mánáidgárdái de ožžot vel 130 000 ru doarjaga.