Prošeavttat mat leat ožžon doarjaga Sámediggeráđis (Bb):
- 96 000 ruvnno prošektii Gáŋgaviikka mearrasámi kultuvrra ja mátkkoštusealáhusa birra
- 300 000 ruvnno Beaivváš Sámi Teáhtera ođđa teáhtervistti ovdaprošektii
- 210 000 ruvnno álgoálbmotprográmmii Barentsregiovnna nuoraide
Gieddedutkan - Mearrasámi kultuvra ja mátkkoštusealáhus
Prošeakta mii galgá čađahuvvot lea veahkkin hábmeme vuođu mearrasámi mátkkoštusealáhusa ovdáneapmái ja márkanfievrrideapmái miehtá mearrasámi guovllu. Sámediggi lea mielas ruhtadit prošeavtta mii lea mearrasámi duođaštusprošeakta mii čalmmustahttá mearrasámi kultuvrra suohkanis, ja dan bokte láhčit dili mearrasámi vásáhusturismii gos eaktivuohta ja jáhkehahttivuohta leat guovddážis. Doarjjaoažžu: Gáŋgaviika suohkan.
Ođđa teáhtervisti Beaivváš Sámi Teáhterii
Sámediggi lea vuoruhan ođđa teáhtervistti Beaivváš Sámi Teáhterii sámi nationála lávdin. Teáhter láigoha čájálmasvistti, kantuvrraid ja eará lanjaid Guovdageainnu kulturviesus. Dat visti ii vástit guđege ládje dálá standárddaid ja dárbbuid. Ođđa sierra teáhtervistti ásahemiin lea guhká juo bargojuvvon, muhto plánat eai leat ovdánan. Sámediggeráđi dieđáhusas sámi ásahusaid ja siviila sámi servodaga birra, lea ođđa teáhtervisti vuoruhuvvon prošekterejuvvot 2013-14:s. Plánenprošeakta galggašii čielggadit makkár ruhtadanortnegat teáhtervistái galget gustot, ja maiddái árvvoštallat goluid. Doarjjaoažžu: Beaivváš Sámi Teáhter.
Álgoálbmotprográmma Barentsregiovnna nuoraide
Interregprošeakta Indigenous Entrepreneurship lea multilaterála prošeakta mii galgá váikkuhit ealáhusovddideapmái ja álgoálbmotservodagaid nannemii ja ovdánahttimii Barentsregiovnnas. Prošektii servet 80 olbmo iešguđet regiovnnain Norggas, Ruoŧas, Suomas ja Ruoššas. Prošeavtta olis galget lágiduvvot kurssat ja oahpahusat dakkár fáttáin go buvttaovddideapmi, márkanfievrrideapmi ja fitnodatfierpmádaga ásaheapmi. Ulbmil lea ovdánahttit fitnodagaid ja dainna lágiin nannet árvvu Barentsregiovnna álgoálbmotservodagaide. Prošeakta lea oaivvilduvvon nuoraide. Eará ruhtadeaddjit leat Finnmárkku, Romssa, Nordlándda, Davvi- ja Lulli-Trøndelaga ja Hedemárkku fylkasuohkanat, Barentsčállingoddi ja Riikkaidgaskasaš Barentsčállingoddi. Doarjjaoažžu: Riikkaidgaskasaš Barentsčállingoddi.
Eanet dieđut ja gulahallit
- Mearrasámi kultuvra ja mátkkoštusealáhus Gáŋgaviikkas: várrepresideanta Marianne Balto, mobiila 48 06 33 58 | Marte Teie Hellum, prošeaktabargi Gáŋgaviikka suohkanis, mobiila 98 61 26 55
- Ovdaprošeakta Beaivváš Sámi Teáhter: ráđđelahttu Vibeke Larsen, tel 94 13 01 16 | Silja Somby, Beaivvái Sámi Teáhtera diehtojuohkinjođiheaddji, mobiila 99 45 38 24
- Álgoálbmotprográmma nuoraide Barentsregiovnnas: várrepresideanta Marianne Balto, mobiila 48 06 33 58 | prošeaktajođiheaddji Lars Miguel Utsi, mobiila 47 24 29 81