Sámediggi dagai juo 2005:s mearrádusa ahte fertejit ásahuvvot sierra báikkálaš hálddašanstivrrat mat sihkkarastet sámiide iežaset rievtti oassálastit suodjalanguovlluid hálddašeamis. Maŋŋil guhkes rahčamiid sihke konsultašuvnnaid bokte ođđa luonddusuodjalanlága oktavuođas ja konsultašuvnnaid bokte mii guoská suodjalanguovlluid hálddašanortnegii, de lea olahuvvon ovttamielalašvuohta gaskkal Sámedikki ja Birasgáhttendepartemeantta.
- Ođđa ortnet sihkkarastá ahte suodjalanguovlluide sihkkarastojuvvo báikkálaš ja sámi stivren, man mun lean sihkar mielddisbuktá ahte mii buorebut go odne gozihit báikkálaš geavaheami, ipmárdusa ja máhtu dáid guovlluid hálddašeamis, lohká Larsen.
Lassin mielláhtuide maid Sámediggi nammada suodjalanguovlostivrraide, de galget searvvis leat mielláhtut dáin suohkaniin ja fylkkasuohkanis. Mielláhtuid logu maid Sámediggi nammada, ferte konsulteret sierra juohke suodjalanguvlui. Lihkká lea ovttaoaivilvuohta dasa ahte guovllu mearkkašupmi sámi kultuvrii ja movt sámi kultuvrra dilli lea guovllus, galget deattuhuvvot váikkuhanfámu sturrodagas, mii ovdanboahtá mielláhtuid logus.
- Mun mielas vuorddašan oaidnit dan praktihkalaš čađaheami dán reforbmas, mii lea stuora lávki sámi kultuvrra nannemis, loahpaha ráđđelahttu Vibeke Larsen.