Bader galledii odne Sámedikki ja beasai gullat sámi historjjá birra, Sámedikki doaimmaheami birra, konsulterenortnega gaskkal Sámedikki ja stáhtalaš eiseválddiid, ja oaččui čájehuvvot Sámediggevistti ovdal go álggiiga ságastallama, gos Olli válddii bajás earret eará dáid áššiid:
- Sámediggi sávvá ahte positiivvalaš USA álgoálbmotpolitihka rievdan maiddái mielddisbuktá ahte USA searvá ON julggaštussii álgoálbmotvuoigatvuođaide. Dás lea stuora mearkkašupmi buot máilmmi álgoálbmogiidda.
- Sámedikki mielas lea positiiva go presideanta Obama lea geažuhan ođđa biraspolitihka birra, ja ahte dát boahtá láidestit USA ođđa geidnui dálkkádatgažaldagas. Dálkkádatrievdamat leat mielddisbuktán ja bohtet ain eanet mielddisbuktit dramáhtalaš váikkuhusaid álgoálbmogiidda árktalaš guovlluin. Sámedikkis leat stuora sávaldagat ovttasbargui mii lea Árktalaš Ráđis.
- Indianár Leonard Peltier lea čohkkán giddagasas 1976 rájis USAs. Sámediggi sáddii dearvvuođaid Presidentii Obamai gos bivdá su guorahallat Peltiera luovosluoitima olmmošlaš diliid dihtii. Sámediggi áigu čálalaččat váldit bajás dán ášši presideanta Obamain.
Ráđđeaddi Bader oaivvildii ahte konsulterenortnet gaskkal Sámedikki ja stáhtalaš eiseválddiid lea miellagiddevaš ja ahte dat mielddisbuktá vejolašvuođaid gávdnat buriid čovdosiid buot beliide. Bader maid deattuhii ahte buorre sámi ovttasbargu mii lea gaskkal Sámedikkiid, sámi organisašuvnnaid ja stáhtalaš eiseválddiid lea riidováidudeaddji.
Sámediggepresideanta Egil Olli deattuhii dehálašvuođa nannet oktavuođaid gaskkal álgoálbmogiid ja ovdanbuvttii signálaid maid Presideanta Obama lea buktán dán oktavuođas. Olli lea movtta go guokte njunuš indianára leaba biddjojuvvon guovddáš ámmáhiidda Obama ráđđehusas. Dát guovttis leaba Pawnee- indianár, profesora Larry EchoHawk ja cherokee- indianár, jurista Kimberly Tehee. Sámediggepresideanta deattuha ahte Obama doallá iežas válgalohpádusaid dan birra ahte addit álgoálbmogiidda stuorit váikkuhanfámu.