Mii leat duhtavaččat jahkebeallásaš konsultašuvnnain mii lea maŋimuš sullii 40 konsultašuvnna gaskkas mat mis leat leamaš ráđđehusain maŋŋá jagi 2005 stuorradiggeválgga. Sámediggi ja ráđđehus leat measta buot konsultašuvnnain juksan ovttamielalašvuođa. Konsultašuvnnat leat leamaš mielde sihkkarastimin buori gulahallama ja ovttamielalašvuođa áššiin main lea stuorra mearkkašupmi sámiide, dadjá Sámedikki presideanta Egil Olli.
Mearraluossabivddu konsešuvdnaortnet
Sámediggi moaitá barggu mearraluossabivddu konsešuvdnaortnegiin dan geažil go dat sáhttá goaridit mearrasámi kultuvrra mii juo ovddežis lea váttis dilis. Konsešuvdnaortnet ráddješii hálddašeami maid lea váttis čađahit lágaid ja konvenšuvnnaid ektui.
Sámediggi vuordá ahte lávkejuvvošii lávki maŋos guvlui barggus konsešuvdnaortnegiin ja árvvoštallojuvvošii ahte leago obage vuođđu ortnegii, dadjá Olli.
Sámi girkoráđđi, Lulli Hålogalándda ja Davvi Hålogalándda bismagottit háliidit oažžut čielgasa mainna lágiin sámelága giellanjuolggadusat gustojit Girkui sámegiela hálddašanguovllus, masa gullet Guovdageainnu, Kárášjoga, Porsáŋggu, Deanu, Unjárgga, Gáivuona, Divttasvuona ja Snoasa gielddat.
Sámegiella girkus
Sámediggi dulko girkolága mielde ahte Girku ferte leat stáhtalaš orgána ja dieinna lágiin gusket sámegiela giellanjuolggadusat maiddái dasa. Dat mearkkaša dan ahte buot girkolaš bálvalusaid sámegiela hálddašanguovllus ferte sáhttit fállat sámegillii, dadjá Olli.
Sámi kultáddejumi goziheapmi NAV:as
Sámediggi bivdá ahte NAV-ođastusas sámi guovlluin biddjojuvvo guovddážii sámi kulturáddejumi goziheapmi ja ahte dat dahkkojuvvo earret eará sámi geavaheddjiid veajuiduhttima ja dearvvašvuođa oktavuođas. Sámediggi bivdá Bargo- ja searvadahttindepartemeantta fuolahit ahte ráhkaduvvo plána sihkkarastit dán perspektiivva.
-NAV lea erenoamáš deaŧalaš ollu sámiide bálvalusaidis bokte sosiálabálvaluslága ja álbmotoadjolága mielde mat leat omd. bearaš- ja penšunaddosat, buhcciidruhta ja veahkkeneavvut. Danne lea deaŧalaš ahte NAV:s lea gelbbolašvuohta maiddái kulturáddejumis iige dušše sámegielas, dadjá Olli loahpas.
Konšultašuvnnat jagi 2005 rájes
Jahkebeallásaš politihkalaš konsultašuvdnačoahkkimat Sámedikki presideantta ja sámeministara gaskka dollojuvvojit konsultašuvdnašiehtadusa viđát čuoggá mielde, ráđđehusa ja Sámedikki gaskasaš miessemánu 11. b. 2005 šiehtadusa vuođul.