Son illuda erenoamážit go gielda ii beroštan lágas mii gáibida unnimusat 10 oahppi álggahit sierra skuvlakreatsa. Álttá gielda lea dáinna daguin váldán vuhtii gieldda sámi álbmoga dárbbuid.
- Álttás leat olu sámit ja Sámedikki jienastuslohkui leat lagabui 1000 olbmo čálihan iežaset. Dát han geatnegahttá sihke gieldda ja Sámedikki. Nu áigutge ráhkadit ovttasbargosoahpamuša mii sihkkarastá buori gulahallama dás duohko, lohká Gaski.
Dákkár soahpamušain váldojit sámi dárbbut vuhtii ja dagaha Álttá gieldda buori ássanbáikin sámi mánáide. Gaski maiddái deattuha man dehálaš gulahallan lea gielddain ja lohká dán huksen buori vuođu ovttasbargui ovddasguvlui.
- Mii han bures diehtit mo gielddat main lea sámi oahpahus skuvllain, rahčet ekonomalaččat. Danin leat ášši ovddidan Gielddaid Oktasašlihtu/Kommunenes Sentralforbund (GO/KS) beavdái buoridan dihtii ekonomiija oahpahusas. Dán mii jáhkkit čoavdit lagamus áiggis, lohká Gaski.
Sámediggi han ii sáhte bidjat ruđa skuvllaid jođihangoluide, deattuha Gaski. Danin leatge nuvttá oahpponeavvut nu dehálaččat gielddaide, vai nagodit máksit goluid. Muhto ohppiide dat lea ain deháleabbo, go eai dárbbaš stensiillaid ja kopiijaid geavahit girjjiid sajis.
- Danin illudange go mánáide šaddá buoret skuvla. Sin skuvlabeaivvis han dat leage dás sáhka, lohká Gaski.