Sámediggepresideanta rabai bearjadaga borgemánu 21. b. Ástávuona giellagoađi mii lea Loabát suohkanis. - Mun in eahpit veaháge ahte sii bohtet lihkostuvvat, dadjá Sámediggepresideanta Egil Olli.
Ástávuona giellagoahti lea logát giellaguovddáš mii lea ásahuvvon. Ovdalaččas leat giellaguovddážat Porsáŋggu gielddas - Sámi giella ja kulturguovddáš, Gáivuonas - Sámi giellaguovddáš, Divttasvuonas - Árran julevsámeguovdásj, Evenášis - Várdobáiki, Unjárggas - Isak Saba guovddáš, Deanus- SEG, Romssas - Moskavuotna/ Ulsfjord, Rørosas - Aajege samiske språk- og kompetansesenter ja Álttás - Álttá Sámi Giellaguovddáš.
-Mii guoská giellaguovddážiidda, de leat dát oassin lihkostuvvamis dáin suohkaniin, lohká Olli.
Loabát suohkan ozai 2008s beassat sámegiela hálddašanguvlui. Ovdal dán jagi evttohii Ráđđehus 2009 dárkkistuvvon našunal- bušeahtas lasihit juolludemiid Sámediggái 1 miljovnna ruvnnuin vai Loabat suohkan váldojuvvošii mielde sámegiela hálddašanguvlui golggotmánu1.b.2009 rájis.