- Sámediggi lea ožžon ollu dieđuid dan birra ahte dát sáhttá mielddisbuktit dramáhtalaš váikkuhusaid ovttaskas olbmui, lohká Sámediggeráđđi Jørn Are Gaski. Ja lasiha; - vásáhusat čájehit ahte heađis lea dehálaš geavahit iežas eatnigiela. Go dákkár gelbbolašvuohta ii gávdno heahtetelefovnnas, de sáhttá dát mielddisbuktit eahpečielgasa ja váilevaš gulahallama, mii fas sáhttá mielddisbuktit duođalaš váikkuhusa.
Ii doarvái dušše sámegielat dulkabálvalusain
Sámegielat dulkabálvalus heahtediehtotelefovnnas ii leat vásihusaid vuođul buorre čoavddus. Dehálaš áigi manná dasa ahte olahit dulkka, ja lea bahá várra ahte ii sáhte addit dárbbašlaš veahki rievttes áigái. Lea maid dehálaš ahte bargi heahtetelefovnnas dovdá sámi báikenamaid ja diehtá gos dat leat. Lea dan sivas dehálaš ahte álo lea sámegielat bargi heahtetelefovnnas.