Sámediggeráđđi čujuha ovttasbargošiehtadussii 2003 rájis Finnmárkku fylkkasuohkaniin gos čuožžu earret eará ahte oassálastit ovttasbarget ovdánahttit, čalmmustuhttit ja konkretiseret sámi ealáhuspolitihka. Regionálalaš ovdánahttinruđat leat ruđat maid Sámediggeráđđi hálddaša doaimmaide ja prošeavttaide main lea oktasaš ruhtadeapmi fylkkasuohkaniiguin. 2009:s lei Sámediggi várren 3,15 miljovnna dása.
Gáisá ealáhusguovddáš ásahuvvui 2007:s ja lea Deanu gielddas. Gáisá ealáhusguovddáš lea guovddáš masa leat čohkkejuvvon smávva máhttoárjjalaš doaimmat mat galget hukset profešunealla, fágalaš ja sosiála birrasa. Ealáhusguovddážiin lea beaktilis organisašuvdna ja čohkke gelbbolašvuođa. Organiseren lea mielde stivreme ovttasbargguid, juogada vásihusaid ja lea veahkkin gelbbolašvuođaloktemii. Gáisá ealáhusguovddáš galgá hástalit hutkás proseassaid ja leat operatevran čađahit ovdánahttinprošeavttaid. Ealáhusguovddážat Norggas leat ovttas dutkan- ja máhttopárkkaiguin dehálaš oassin váikkuhangaskaoapmeapparáhtas mii galgá čuovvolit ja bidjat johtui mearriduvvon ealáhus- ja regionálapolitihka.