Buohkat geat eai leat ožžon válgakoartta fertejit iskat leatgo Sámedikki jienastuslogus. Jos it gávnna iežat nama doppe, de válddes njuolga oktavuođa Sámedikkiin, dahje sáhtát fitnat geahččamin gieldda geahččanjienastuslogus.
Váldde oktavuođa Sámedikkiin tlf. 78 47 40 00, dahje e-poastta bokte samediggi@samediggi.no
Buohkat geat eai beasa ovdagihtii jienastit, fertejit bivdit gieldda iskat dieđuid dihtorvuogádagas Valg2009, mii beaivválaččat dievasmahttojuvvo Sámedikki bealis, dahje ieš sáddet váidaga Sámediggái dan birra go ii leat jienastuslogus.
Sáhtát maid bivdit gieldda váldit oktavuođa Sámedikkiin telefovnna bokte, jos it beasaš ovdagihtii jienastit. Gielda sáhttá dalán riŋget Sámediggái telefovdnii 78 47 40 00.
Gitta válgabeaivvi rádjai 14.09.2009 sáhttá buktit váidaga. Sámediggi dievasmahttá jienastuslogu nu guhká go dat lea geavatlaččat vejolaš.
Sáhttet leat máŋga siva dasa go olbmot gahččet eret jienastuslogus. Dasa sáhttá leat sivvan omd. dat go olbmot fárrejit, molsot nama dahje čálihit jienastuslohkui hui lahka maŋimuš áigemeari, mii lea geassemánu 30. b.
Geassemánu 30. b. maŋŋá giddejuvvo jienastuslohku, ja ádjána veaháš dievasmahttit dan. Dat ferte dahkkojuvvot ovttagaslaččat.
Sámediggi meannudii maŋimuš sámediggeválggain sullii 80 váiddaášši.
Sámediggi dárkkista jienastuslogu dađistaga ja sihkkarastá ahte sii, geain lea jienastanvuoigatvuohta besset jienastit jagi 2009 sámediggeválggain.