Justiisalávdegotti lahtuin lei sáhkavuorru
Stuorradikki justiisalávdegotti golbma lahtu besse sárdnidit Sámedikki áirasiidda ovdalgo lága meannudeapmi álggahuvvui.
Lávdegotti jođiheaddji Trond Helleland deattuhii ahte Finnmárkkuláhka ii mearkkaš loahpa, muhto baicce ođđa áigodaga álggu Sámediggái, sápmelaččaide ja olles Finnmárkku álbmogii.
Knut Storberget deattuhii ahte láhka ollašuhttá daid álbmotrievttálaš geatnegasvuođaid, maidda Norga lea čadnojuvvon eamiálbmoga ektui. Storberget biehttalii dattetge ahte dát mange láhkai fuotnuda eará álbmoga vuoigatvuođaid.
Lávdegoddelahttu Finn Kristian Marthinsen deattuhii ahte proseassa lea leamaš bargogáigideaddji iige leat leamaš riidduid haga gaskal politihkalaš bellodagaid dahje gaskal guoskevaš beliid. Marthinsen deattuhii dattetge ahte Sámediggi lea leamaš huksejeaddji bealli proseassas ja ahte láhka lea buorre.
Čoahkkin loahpahuvvui dalá maŋŋá jienasteami, dii. 14.30.