Sihkkarastin dihte jođáneabbo válgaloahppameanuid de lea Sámediggi mearridan ahte suohkaniin main ledje mannan válggain 29 jienasteaddji dahje unnit, lea dušše vejolaš ovdalgihtii jienastit. Suohkaniin gos mannan válggain ledje 30 jienasteaddji dahje eambbo, lea vejolaš sihke ovdalgihtii jienastit ja jienastit válgabeaivvi. Muitte iskat dan iežat válgakoarttas, dahje gulaskutta iežat ruovttosuohkaniin.
Ođđa válgaortnet mielddisbuktá earret eará ahte áirraslohku unnu 43 áirasis 39 áirasii (dássenmandáhtat leat váldon eret) ja válgabiiret unnot 13 válgabiires 7 válgabiirii. Lassin besset jienasteaddjit rievdadit evttohasortnetvuoru ja doaba sámi jienastuslohku rievddai Sámedikki jienastuslohkui.
Jienastanlihpu rievdadeapmi
Jus áiggut rievdadit evttohasortnetvuoru jienastuslihpus, de čálát sávahahtti evttohasnummara evttohasa nama ovddabeallái. Don sáhtát dušše divvut vihtta bajimus evttohasaid jienastuslihppus, dahje nu galle mandáhtat go biirii galget válljejuvvot, jus dat lohku lea eambbo go vihtta. Eará rievdadusat jienastuslihppus eai lohkko válgaloahppameanuin.
Muitte duođaštusa go jienastat! Ii leat doarvái almmuhit nama ja riegádandáhtona. Duođaštus sáhttá ovdamearkka dihte leat pássa, vuodjinkoarta dahje báŋkokoarta mas lea govva, muhto sáhtát maiddái geavahit earalágan duođaštusa. Duođaštusa gáibádusat leat ahte das lea jienasteaddji namma, riegádandáhton ja govva, nu ahte váldde mielde dan mii dus lea! Jus son gii vuostáiváldá jienasteami dovdá du, de beasat jienastit duođaštusa haga.
Jus don leat orrume muhtun ásahusas nugo buhcciidruovttus, buohcceviesus dahje giddagasas, de sáhttá ásahusa bargi duođaštit du identitehta.
Goas ja gos sáhtát jienastit?
Ovdalgihtii jienasteapmi álggahuvvo 10.08.09 ja bistá 11.09.09 rádjái. Olgoriikkas sáhtát jienastit ovdalgihtii gitta 04.09.09 rádjái.
Ovdalgihtii jienasteapmi
Lea du iežat ovddasvástádus fuolahit ahte du ovdalgihtii jienasteapmi lohkkojuvvo. Dat mielddisbuktá ahte fertet jienastit buori áiggis vai du jietna olle du ruovttusuohkanii, dahje lohkansuohkanii, ovdal 14.09.09 dii. 21.00.
Ovdalgihtii jienasteamis lea dehálaš váldit mielde jienastankoartta, danne go jienastankoarttas čuožžu gosa du jienasteapmi galgá sáddejuvvot.
Ná jienastat ovdalgihtii
Ovdalgihtii jienasteapmi lea veahá earalágan go dábálaš jienasteapmi válgabeaivvi:
- Váldde oktavuođa suohkana bálvaluskantuvrrain.
- Válgabargi addá dutnje jienastanlihpu konvoluhta ja mieđušta du muhtun jienastančihkii.
- Gávnna dan jienastanlihpu maid áiggut geavahit.
- Rievdat jienastanlihpu jus dan áiggut dahkat.
- Cokka jienastanlihpu konvoluhttii.
Mana válgabargi lusa, son coggá jienastanlihpu konvoluhta ja du válgakoartta eará konvoluhttii ja coggá dan dasto jienastanlihttái.
Válgabeaivi lea 14.09.09. Muhtun suohkanat dollet válggaid maiddái sotnabeaivve 13.09.09. Válgabeaivvis fertet jienastit dan suohkanis gos ledjet álbmotregistaris čálihuvvon ássin 30.06.09. Jus don leat buohcci dahje bargonávccaheapme, de sáhtát ohcat suohkanis lobi jienastit ruovttus.