Šiehtadallamat gaskal Sámedikki ja duodjeorganisašuvnnaid Sámiid Duodji ja Duojáriid ealáhussearvi ođđa duodjeealáhusšiehtadusa birra leat dál botkejuvvon.
Sámediggi fálai 9,8 miljon ruvnno, mii lea 0,6 miljon ruvnno dahje 6,4 % lassáneapmi dán jagáš šiehtadusa ektui.
Vibeke Larsen šálloša dan boatkaneami. Son oaivvilda ahte lei buorre fálaldat danne go doaibmadoarjjaortnet ja organisašuvdnadoarjja sámi duodjeorganisašuvnnaide nannejuvvui.
Šiehtadallamat boatkanedje danne go organisašuvnnaid gáibádusat sierra márkankonsulentii eai dohkkehuvvon. Sámediggi oaivvilda ahte berre geavahit ja ovddidit daid vuovdin- ja márkanfievrridankanálaid mat dál gávdnojit dan ovdii go ásahit ođđa ortnega.
Ealáhusšiehtadusa ulbmil lea nannet duoji ealáhussan ja kulturguoddin.
Sámediggeráđi lahttu Vibeke Larsen sáhttá kommenteret eanet mediai ja pressii.
Gulahallanolmmoš/Kontaktperson: Medlem i Sametingsrådet Vibeke Larsen tlf. 94 13 01 16