Sámediggepresideanta Egil Ollis lei ságastallan sihke ON generálačálliin Ban Ki- moonain, biras- ja ovddidanministariin Erik Solheimain, álgoálbmotaktivisttain ja ovddeš Inuit Circumpolar Council (ICC) jođiheddjiin Sheila Watt- Cloutieriin ja maid dálkkádatdutkiiguin ja eaktodáhtolaš organisašuvnnaid ovddasteddjiiguin Birasgáhttendepartemeantta dálkkádatseminára oktavuođas Svalbardas čakčamánu 2. b. 2009.
Stuorimus hástalus
-Dálkkádatáitta lea duođalaš ja lea min áiggi stuorimus hástalus, ja lei balddihahtti gullat ahte jus eat bargga dálkkádatrievdamiid vuostá de mielddisbuktá dat katastrofalaš váikkuhusaid olmmoščerdii, lohká Sámediggepresideanta Egil Olli.
Álgoálbmogat rašimusat
ON generálačálli Ban Ki-moon deattuhii ahte lea máilmmi ovddasvástideaddji jođiheddjiid bargu ráhkadit riikkaidgaskasaš šiehtadusaid mat láhčet dili nu ahte máilbmi sáhttá birget dáiguin dramáhtalaš dálkkádatrievdamiin maid mii dál vásihit.
Generálačálli muitalii viidáset ahte erenoamážit álgoálbmogat ja smávva suolostáhtat leat rašimusat dálkkádatrievdamiidda.
-Álgoálbmogiidda čuhcet dálkkádatrievdamat. Dát vuorjá, ja de lea buorre diehtit ahte ON lea fokus álgoálbmogiidda dálkkádatgažaldagain, lohká Olli.
Oassálastet dálkkádatnjunuščoahkkimis
Sámediggepresideanta oaččui viidáset duođaštusaid stáhtaráđis Erik Solheimas Birasgáhttendepartemeanttas dasa ahte Sámediggi lea bovdejuvvon searvat čoahkkimiidda ja Norgga delegašuvnnas dálkkádatnjunuščoahkkimii Københámmanis juovlamánu 2009.
Viidáset ledje Sámedikkis ságastallamat Sheila Watt-Cloutheriin buori ovttasbarggu birra mii lea inuihtaid ja sápmelaččaid gaskkas ja mii ferte viidásetfievrriduvvot dálkkádatšiehtadallamiin boahtteáiggis.
-Hástalus lea dahkat čáppa sániid duohta bargun, dát ovddasvástádus lea mis buohkain, buorrin boahtteáiggi buolvvaide, lohká Olli loahpas.