Duhttavaš
- Mun lean hui duhtavaš go lea šaddan ovttamielalašvuohta ráđđehusa ja Sámedikki gaskka regionála dutkanfoanddaid stivranammademiin ja stivračoahkkádusain, dadjá ráđđelahttu Hilde Anita Nyvoll.
Sámediggi galgá evttohit ovtta lahtu ja várrelahtu Davvi-Norgga ja Gaska-Norgga foandaregiovnnaid foandastivrraide.
Dasto šattai ovttamielalašvuohta das ahte foandaregiovnnat Davvi-Norga, (Finnmárku, Romsa ja Norlánda), Gaska-Norga, (Davvi-Trøndeláhka, Mátta-Trøndeláhka ja Møre ja Romsdal) ja Innlandet, (Hedmárku ja Opplánda) galget maiddái gozihit sámi dutkanberoštusaid ja -dárbbuid, mii biddjojuvvo mielde ulbmilii.
Gozihuvvošedje sámi áššečuolmmat
Dieđáhusas hálddašanođastusa hárrái, Sd.dieđ. nr.12 (2006-2007) deattuhuvvo ahte ráđđehus háliida lávgadet oktavuođa ealáhuseallima, allaskuvllaid, regionála dutkandoaimmaid ja regiovnna gaskka, láhčin dihte ealáhusovddideami ja innovašuvnna. Sámediggi dovddahii dán proseassas ahte sii leat mielas ásahit regionála dutkanfoanddaid. Seammás deattuhuvvui ahte Sámedikkis lea beroštupmi ahte dutkan- ja čielggadanruđaiguin gozihuvvošedje sámi áššečuolmmat. 2009 stáhtabušeahta meannudeami oktavuođas guorrasii Stuorradiggi ráđđehusa evttohussii ahte ásahuvvojit regionála dutkanfoanddat. Ráđđehus deattuhii ahte regionála foanddat galget dievasmahttit nationála FoU ruđaid. Ovttasráđiid Gielda- ja guovludepartemeanttain mearridii Máhttodepartemeanta 12.05.09 beaiváduvvon reivves čieža foandaregiovnna.
Sámediggái lea deaŧalaš ahte sámi dutkanberoštusat gozihuvvojit regionála dásis. Dát lea deattuhuvvon maiddái Sd.dieđáhusas nr.28 (2007-2008). Sámi dutkanberoštusat berrejit vuolggasajis gozihuvvojit seamma dásis miehtá riikka. Unnimus gáibádus lea ahte dutkanberoštusat gozihuvvojit seamma vugiin árbevirolaš sámi guovllus. Dát ollašuvvá regionála foanddaid ásahemiin. Doppe gos sámi kultuvra lea erenoamážit áitojuvvon, nugo máttasámi guovllus, ferte doaibmabijuid bidjat johtui sierra guovlluin. Dán oktavuođas lea dutkan ja nana dutkanbirrasiid ja ásahusaid ovddideapmi deaŧalaš gaskaoapmi.