Eanandoallo- ja biebmoministtar Brekk ja birasgáhttenministtar Solheim nammadeigga bargojoavkku mii galggai unnidit riidodási "boraspire - boazodoallu" Davvi- Trøndelágas. Raporta almmuhuvvui čakčamánu 7. beaivvi.
Raporttas muitaluvvo áššiid birra mat leat diehttelasat, ii ge maide dan birra mii sáhtášii buoridit boazodoalu dili, lohká ráđđelahttu Vibeke Larsen.
-Mii fertet jođánit guorahallat Norgga boraspirepolitihka ođđasit. Mis ii leat áigi massit, leat nu ollu boazodoallit geat veardádallet heaitit boazodoaluin boraspiriid geažil. Munnje leat dát hui duođalaš dovddaheamit lohká Vibeke Larsen.
Eanandoallo- ja biebmodepartemeanta ja birasgáhttendepartemeanta giddeba čalmmiid vai eaba oainne hástalusaid maiguin boazodoallu beaivválaččat ferte soahtat. Sii nammadedje dán bargojoavkku almmá dieđiheamis Sámediggái, dušše dát juo čájeha departemeantta váilevaš doahttaleami sámi álbmoga miel- váikkuhanfápmui áššiide mat gusket sápmelaččaide, loahpaha Larsen.