Sámedikki presideanta Egil Olli lea hui duhtavaš go Mánáid- ja dásseárvodepartemeanta ja Bargo- ja searvadahttindepartemeanta leat boahtán ovttaoaivilii Sámedikkiin ahte prošeavtta ruhtadeapmi álggahuvvo.
- Sámediggeráđis lea dásseárvu ja vealahanvuostálasti bargu vuoruhuvvon áŋgiruššansuorgin, ja mii leat movtta go mii dán prošeavtta bokte sáhttit oažžut eanet dieđuid ja álggahit doaibmabijuid, maiguin sáhttit ovddidit servodaga dáin dadjá presideanta Egil Olli.
Son deattuha ahte dát lea oassi barggus maid Sámediggi áigu čađahit iežas dássearvostrategiijabarggu oktavuođas sámi servodagas.
Dat golbma oasálačča leat geatnegahttojuvvon addit 1 miljon ru jahkásaččat prošektii mii galgá bistit badjelaš golbma jagi. Dán jagi addá MDD 200 000 ru prošeavtta álggaheapmái. Golbma čuovvovaš jagi addet MDD jahkásaččat 500 000 ru, ja BSD 200 000 ru ja Sámediggi 300 000 ru.
Ovttasbargooasálaččaid ulbmilin lea ahte prošeakta buvttihivččii stuorát áŋgiruššama ja stuorát dihtomielalašvuođa sámi álbmoga gaskkas surggiin dásseárvu ja vealahanvuostálastin. Buot dieđuid ja duođaštusa gaskkusteamis galgá sámegiella gozihuvvot, deattuhit bealit.