Máhttodepartemeanta lea várren 2 miljovnna ruvnno, Bargo ja searvadahttindepartemeanta 1 miljovnna ruvnno ja Sámediggi 500 000 ruvnno ruhtadeapmái lohkanguovddáža doibmii. Guovddáža doaibma galgá leat oassin stuora áŋgiruššamis sámi giela nannemis boahtte 5 jagi, Sámegielaid doaibmaplána.
- Guovddáža ásaheapmi dahká maid álkibun álggahit sierra sámi skuvlaluohkáid olggobealde sámi giela hálddašanguovllu. Bargiidbellodahkii lea mihttun ahte sápmelaččain galgá leat buorre skuvlafálaldat gos ihkinassii Norggas sii orrot. Lea áibbas lunddolaš ahte álggahuvvojit sierra skuvlaluohkát stuora gávpogiin, lohká várrepresideanta ja rámida Álttá, Romssa ja Oslo gos juo gávdno dákkár fálaldat.
Sámediggeráđđi čujuha dasa ahte dát gelbbolašvuođaguovddáš šaddá dehálaš doarjjafunkšuvdnan buohkaide geat geavahit sámegiela oahpahusas ja giellaoahpaheamis. Odne lea stuorimus váttisvuohta dat go eai gávdno doarvái oahpaheaddjit. Dan sivas lea dál manus kampánja oččodit eanet olbmuid álgit oahpaheaddjin ja dás boahtá lohkanguovddážis leat dehálaš funkšuvdna.
- Jus mii galgat lihkostuvvat oažžut sámegiela beaivválaš giellan sámiid gaskkas vaikko gos riikkas sii orrot, de fertet mii áŋgiruššat mánáidgárddiin, astoáiggefálaldagas, vuođđoskuvllas, giellaguovddážiin ja alit oahpahusas. Dás boahtá lohkanguovddáš leat doarjjan dieđuiguin, ráđđeaddin ja nevvodeaddjin buohkaide geat oahpahit sámi giela ja sámegillii, lohká Balto.
Lohkanguovddáš lea oassin stuorát áŋgiruššamis ja boahtá leat oassin Ráđđehusa Sámegielaid doaibmaplánas. Dát lea áŋgiruššan mii dáhpáhuvvá lagas ovttasbarggu bokte Sámedikkiin. Dasa lassin lea Sámediggi bidjan johtui giellaprográmma ovttas Sámi allaskuvllain gos okta mihttu lea addit sámi rávisolbmuide vejolašvuođa oahppat sámi giela.
- Ollu sámi rávisolbmuide lea dilli dat ahte sii leat massán iežaset giela. Muhtimat goitge máhtte giela ieš guđet ge meari ja sis lea stuora sávaldat beassat albma ládje oahppat iežaset giela. Buohkaide dáidda galgat mii addit fálaldaga oažžut gielaset ruovttoluotta, lohká várrepresideanta Marianne Balto.