Gielddaid čeahpes válgamielbargiid geažil čájehuvvo ahte áirrasjuohku mii bođii diibmo beal golmmas válgaija lea viehka sihkar.
Válgaortnet maid Sámediggi lea láhččán lea bures lihkostuvvan, lohká gulahallandirektevra Jan Roger Østby.
Buot gielddat galget gaskavahku dii. 15.00 rádjái sáddet jienastanlihpuid viidáseabbut loahpalaš lohkamii válgabiire lohkanválgastivrii.
Lohkanválgastivra čađaha loahpalaš lohkama ja juohká mandáhtaid. Jus lohkanválgastivra gávdná boasttuvuođaid sámeválgastivrra mearrádusain jienastemiid dahje jienastanlihpuid dohkkeheamis ja hilgumis, dahje sámeválgastivrra lohkamis, de galget boasttuvuođat njulgejuvvot.