Loahpalaš lohkan ja mandáhtaid juohkin
Buot gielddat galget dii. 15.00 rádjái gaskavahku čakčamánu 16. b. sáddet jienastanlihpuid viidáseappot válgabiire lohkanválgastivrii loahpalaš lohkamii. Oppa biirre jienastanlihpuid lohkan ja loahpalaš válgarehkenastin dáhpáhuvvá doppe.
Lohkanválgastivra čađaha loahpalaš lohkama ja juohká mandáhtaid. Jus lohkanválgastivra gávdná boasttuvuođaid sámeválgastivrra mearrádusain jienastemiid dahje jienastanlihpuid dohkkeheamis ja hilgumis, dahje sámeválgastivrra lohkamis, de galget boasttuvuođat njulgejuvvot.
Evttohasaid válljen
Go lohkanstivra lea mearridan galle mandáhta guđege lista oažžu, de juogada mandáhtaid listta evttohasaide. Evttohasat mat eai leat válljehahttit eai sáhte oažžut mandáhta.
Vuos lohkkojuvvojit dat namat main lea nr. 1 jienastanlihpus. Dat evttohas gii lea biddjojuvvon eanemus háviid nummir oktan, válljejuvvo. Dasto lohkkojit dat namat main lea nr. 2 jienastanlihpus. Dat evttohas gii eanemus gerddiid lea biddjojuvvon nummir guoktin go vuosttas ja nuppi lohkanbohtosiid bidjet oktii, válljejuvvo. Lohkamat jotket seamma láhkai dassážii go listta buot áirrassajiin lea olmmoš. Jus evttohasat ožžot seamma bohtosa, de mearrida álgovuorrolohku listtas.
Juohke lista galgá oažžut - mađe mielde lea vejolaš - seamma ollu sadjásašáirasiid go áirasiid, ja lassin vel golbma. Sadjásašáirrassajit juogaduvvojit seamma vuogi mielde go áirasat.
Vejolašvuohta guoddalit
Buohkat geain lea jienastanvuoigatvuohta, sáhttet guoddalit dilálašvuođaid dan válgabiirre válgga válmmašteamis ja čađaheamis, mas sii leat čálihuvvan Sámedikki jienastuslohkui. Jienastanvuoigatvuođaáššiin dahje jienastanvejolašvuođaáššiin lea susge guoddalanvuoigatvuohta, gii ii leat čálihuvvan jienastuslohkui.
Guoddalus galgá leat ovddiduvvon ovdalgo čieža beaivvi leat vássán maŋŋá válgabeaivvi. Guoddaleapmi lohkanválgastivrra válgaloahpparehkenastimis galgá leat ovddiduvvon ovdalgo čieža beaivvi leat vássán maŋŋágo válgaboađus lea almmuhuvvon.
Sámediggi lea guoddalaneiseváldi.