Dát girji lea nubbi girji ráiddus Sámi logut muitalit. Vuosttaš girji ilmmai 2008:s. Sámediggi ja Bargo- ja searvadahttindepartemeanta dat leat nammadan Sámi statistihka fágalaš analysajoavkku 2007:s.
Analysajoavkku mandáhtan ii leat ráhkadit statistihka, muhto gávdnat ovddeš statistihkaid sámi diliid birra ja buktit mearkkašumiid daidda.
Dá leat muhtun bohtosat raporttas:
•· Dán raportta bohtosat čájehit ahte eai leat gávdnon čielga erohusat dearvvašvuođas sámi ja ii-sámi álbmoga gaskkas, nugo lea raporterejuvvon muhtun eará álgoálbmotjoavkkuid birra. Raporta čájeha ahte sámit leat eanet duhtameahttumat dearvvašvuođadoaimmahagain go dážat.
•· Maŋimuš logijagiin lea barggolašvuohta vuođđoealáhusain boazodoallu, eanadoallu ja guolástus sámi ássanguovlluin njiedjan.
•· Golmma jagis 2006 rájes 2009 rádjai njiejai vuođđoskuvlaohppiid lohku sámegielas nubbingiellan 593 ohppiin. Dat mearkkaša dan ahte fága massii 29 % ohppiin maŋimuš golmma jagis. Seamma áigodagas geahppánedje sámi mánáidgárddit 67:s 60:ái. Oppalaš mánnálohku geain lea sámegielat mánáidgárdefálaldat, njiejai maid veaháš, muhto vuođđoskuvlaohppiid lohku geain sámegiella lea vuosttašgiellan lea bisson viehka seamma dásis dán áigodagas.
•· Oahppodássi olbmuid gaskkas geat leat gaskal 24 ja 65 jagi Sámi ovddidanfoandda guovllus (guovlu gos Sámediggi juolluda doarjagiid) čájeha ahte leat eambbogat geat eai leat čađahan joatkkaoahpu riikka gaskameari ektui. Nuppi dáfus leat SOF-guovllus viehka ollu nissonolbmot geat leat čađahan universitehta- dahje allaskuvlaoahpu. Bieđgguid ássanguovlluin lea oassi stuorát go riikka gaskamearri, gos fas dat lea unnit čoahkkebáikkiin. SOF-guovllus lea albmáid gaskkas universitehta- dahje allaskuvlaoahppu unnit go gaskamearri riikkas, erenoamážit čoahkkebáikkiin.