Lea 20 jagi áigi go Norgga Sámediggi ásahuvvui. Gonagas Olav V rabai vuosttaš Sámedikki golggotmánu 9. b. 1989.
Sámediggi čalmmustahttá dáhpáhusa earret eará sámi dáidda- ja duodječájáhusain rabas báikkis sámedikkivisttis Kárášjogas.
Dáiddárat geat dán háve leat mielde,leat Rannveig Persen, Gunnvor Guttorm, Arnold Johansen, Folke Fjällström, Hans Ragnar Mathisen, Trygve Lund Guttormsen ja Britta Marakatt- Labba.
Dat lea Else Marie Isaksen sámedikkis guhte lea hápmen čájáhusa.
Dán čájáhusa fáddá lea Sámepolitihkka ovdal...dál...boahtte áiggis.
Ovdalaččas lea Sámediggi ožžon luoikkas guokte čuolahusa Riddu Duottar Museas maid Annelise Josefsen ja Ingunn Utsi leaba ráhkadan.
Viidáseappot lea Sámedikkis bistevaš čájáhus 1. gearddis maid Synnøve Persen, Kåre Kivijärvi, Astri Aasen, Hilde Skancke Pedersen, Inga Nordsletta, Jon Ole Andersen, Martha Jåma, Maja Dunfjell ja Kristin Ytreberg leat hábmen.
Jus háliidat eanet dieđuid dáidagiid birra, de gávdnojit máhpat Sámedikki kantiinas, resepšuvnnas ja beavddi nalde olggobealde dievasčoahkkinlanja.