Gonagaslaš majestehtat, sámediggeáirasat ja guossit.
Sámedikki bealis sávan bures boahtima Gonagaslaš Majestehtii Gonagas Harald V:ii, Gonagaslaš Majestehtii Dronnet Sonja:i, Sámediggeáirasiidda ja gussiide dán guđát sámediggerahpamii.
Gonagaslaš Majestehta Gonagas Olav V rabai vuosttaš Sámedikki golggotmánu 9.beaivve 1989:s.
Lean ilus go oainnán man ollu sámi servodat lea ovdánan maŋimus guoktelogi jagis dan rájes go mun válljejuvvojin vuosttaš geardde Sámediggái.
Okta dehálaš lávki ovddasguvlui lea Finnmárkkuláhka. Dál beassat mii finnmárkolaččat ovttas hálddašit Finnmárkku eatnamiid.
Nubbi dehálaš lávki lea konsultašuvdnaortnet, mii lea ásahuvvon Sámedikki ja eiseválddiid gaskka. Dát ortnet lea buoridan gulahallama Norgga guovtti álbmoga gaskka, namalassii dážaid ja sápmelaččaid.
Riikkaidgaskasaččat mii leat leamaš mielde ásaheamen ONa julggaštusa álgoálbmogiid vuoigatvuođaid birra, mii bidjá uhcimusstandárdda dasa mo stáhtat galget meannudit álgoálbmogiiguin. Sámediggi áigu ain doarjut álgoálbmogiid dain riikkain gos dát uhcimusstandárda ii čuovvoluvvo.
Munnje lea maid illun oaidnit mo eanebut besset geavahit sámegiela árgabeaivvis, go eanet gielddat leat searvan sámelága giellahálddašanguvlui.
Kultuvrra bealis háliidan máŋggaid gaskkas namuhit Mari Boine ja The BlackSheeps. Dát leat guokte buori ovdamearkka dasa mo sápmelaččat iežaset dáiddačehppodagain leat mielde riggudahttimin Norgga.
Vaikko ollu lea buorrána dan rájes go Sámediggi ásahuvvui, de leat mis ain hástalusat.
Mearrasámiin leat stuorra vuordámušat dasa mo Sámediggi, ráđđehus ja Stuorradiggi meannudit Finnmárkku riddoguolástanlávdegotti evttohusa. Dás árvaluvvo nannet Finnmárkku vuonaid ja riddogátte olbmuid bivdovuoigatvuođaid.
Hástalussan lea dasto maiddái sámi vuoigatvuođa čielggadeapmi Romssas ja máttás guvlui. Vaikko leatge ollen guhkás dáppe Finnmárkkus, de lea maid dehálaš suddjet eará sámi servvodagaid ja guovlluid.
Maŋemuš áigge lea leamaš garra digáštallan Sámedikki ja sámi vuoigatvuođaid birra. Mu mielas lea dákkár ságastallan dehálaš ja lea buorre oaidnit mo stuorra eanetlohku Norggas doarju Sámedikki ja sápmelaččaid rahčamušaid.