- Sámediggeráđđi háliida gulahallat rittu guovllu álbmogiin makkár beroštusaid ja vuoigatvuođaid fertešii sihkkarastit vuotna- ja riddoguovlluin, dadjá Sámedikki presideanta Egil Olli.
Bargu Riddoguolástanlávdegotti čielggadusa NÁČ 2008: 5 'Retten til fiske i havet utenfor Finnmark' čuovvolemiin lea álgodásis.
Sámediggi áigu čađahit konsultašuvnnaid Guolástus- ja riddodepartemeanttain dan birra. Dan oktavuođas háliida sámedikki presideanta doallat rabas gulahallančoahkkimiid riddoguovllu álbmogiin.
Mun háliidan rabas čoahkkimiid dan dihte vai oččošeimmet árvalusaid ja oainnuid dasa maid ferte bidjat vuođđun guolástusa vejolašvuođaid ja rivttiid sihkkarastimis riddo- ja vuotnaguovlluin, dadjá Olli.
Sámediggi áigu maŋŋá dieđihit áiggi ja báikki gos dát čoahkkimat dollojuvvojit.
Sámedikki presideanta áigu juo golggotmánu 29. b. searvat čoahkkimii maid Vuotnabivdiid searvi lágida Fállevuonas duorastaga golggotmánu 29. b. dii. 1900.