-Sámediggeráđi 2010 bušeahttaárvalus čájeha ahte mii leat álggaheamen čađahit min politihkalaš geađgejuolggi doaibmabijuid. Dát oainnusmahttojuvvo giella- ja kulturáŋgiruššamiid bokte, dadjá sámediggeráđi lahttu Vibeke Larsen.
Loabága suohkan gullá dál sámegiela hálddašanguvlui. Danne bajiduvvo guovttegielatvuođa doarjja gielddaide badjel 3 000 000 ruvnnuin.
Sámegiela nannen čuovvoluvvo eanet ruđaiguin giellaovddidanprošeavttaide, oahppostipeanddaide ja sámi publikašuvnnaide.
Sámi lohkanguovddáš oažžu bissovaš doarjaga 500 000 ru ja 2010:s čađahuvvo viiddis giellaiskkadeapmi.
Kultursuorggis lea lasihuvvon 250 000 ru sámi deaivvadansajiide.
Sámediggeráđđi vuoruha máttasámegiela ja bajida doarjaga Åarjelhsaemien Teaterei 270 000 ruvnnuin.
2 000 000 ru várrejuvvo investerendoarjjan ođđa girjebussiide Mátta-Trøndelágas ja Guovdageainnus.
Sámediggeráđđi áigu 2010:s čielggadit Verdde-prošeavtta ásaheami, mas leat mielde ođđa mállet ja arenat nággočoavdimii.
-Šállošit go Ráđđehusa stáhtabušeahtta evttohus ii atte saji stuorát rievdadusaide Sámedikki bušeahtas. Sámediggeráđđi lea várren ruđaid bálká- ja haddegoarkŋumii daid ásahusaide mat ožžot njuolgga doarjaga Sámedikkis. Dieidda lassin leat mii vuoruhan álggahit daid doaibmabijuid maid eanetlohkoráđđi lea geatnegahttojuvvon čađahit boahtte njeallje jagis, dadjá Vibeke Larsen loahpas.