-Sámedikki bealis oaidnit hui heittogin sámi giela ja kuvltuvrra ođđasis ealáskuhttimii Skániid sámi guovllus jus Vågsfjord joatkkaskovlá Skániin heaittihuvvo nu mo lea evttohuvvon, dadjá Sámedikki várrepresideanta Laila Susanne Vars.
-Skániid joatkkaskuvla lea deaŧalaš dán guovllu sámi giela ja kultuvrra gáhttemii ja ovddideapmái, dadjá Sámedikki várrepresideanta Laila Susanne Vars.
Skániid joatkkaskuvlla oahpaheaddjigoddi lea ovddidan gelbbolašvuođa sámegielas, sámi fágain ja sámi diliid birra, ee. prošeavtta Sámi kulturmáhttu Romssa joatkkaskuvllain bokte, ja dát gelbbolašvuohta berre boahtit oahppiide buorrin.
-Lea deaŧalaš áimmahuššat ja ovddidit dán gelbbolašvuođa, dadjá Vars.
-Min oaidnu lea ahte skuvlaheaittihemiid ferte geahččat viidát servodatperspektiivvas go dat čuohcá garrasit báikkálaš servodagaide dainna lágiin ahte dat mielddisbuktá eretfárremiid sámi giella ja kultuvrra resursaguovddážiin. Danne mii ávžžuhit fylkkaráđi ja Romssa fylkkadikki bisuhit Skániid joatkkaskuvlla, dadjá Vars.
Sámedikki várrepresideanta lea fitnan Romssas ságastallamin dán ášši veahkkefylkkaoahpahushoavddain Håkon Figenschou:in.
Sámediggi áigu dán ášši váldit ovdan ráđđehusain ja bivdit ahte gielddat ja fylkkagielddat ožžot buoret rámmaevttuid vuođđooahpahussii sámegielas ja sámegillii ja sámi diliid birra guovlopolitihkalaš váikkuhangaskaoapmin.
Sámedikkis lea bivdán dollojuvvot stuorra hoahppočoahkkima njealji ministariin daid guovlopolitihkalaš váikkuhusaid birra, maid sámi guovlluid skuvlaheaittiheamit mielddisetbuktet, ja erenoamážit Divttasvuona suohkana Moskke skuvlla heaittiheami oktavuođas ja Romssa Fylkkadikki vejolaš mearrádusa oktavuođas ahte heaittihit Vågsfjord joatkkaskovlá Skániin.