Sámiráđis ja ruoššabeale sámiin lea áicisadji ráđis. Sámi parlamentáralaš ráđi bargui gullet áššit mat gusket sámiide rastá riikarájiid. Sámi parlamentáralaš ráđđi galgá doaibmat oktasašorgánan ja galgá gozihit sámiid beroštumiid ja nannet sámiid ovttasbarggu riikarájiid rastá.
Sámi parlamentáralaš ráđi ulbmilin lea maiddái oktiičatnat sámiid áššiid riikkaidgaskasaččat ja erenoamážit eará eamiálbmogiid ektui máilmmis.
Sámi parlamentáralaš ráđđi ásahuvvui njukčamánu 2. b. 2000 ja Sámedikki presideanta Sven-Roald Nystø válljejuvvui ráđi vuosttas presideantan áigodahkii 2000 – 2001. Sámi parlamentáralaš ráđđi lea mearridan ahte čállingoddin galgá doaibmat dat Sámediggi mas lea presideanta. Sámi parlamentáralaš ráđi bargu ruhtaduvvo dál vuos sámedikkiid dábálaš doaibmabušeahtas.
Vuosttaš dábálaš ráđđečoahkkin dollojuvvui Anáris golggotmánu 6. b. 2000. Nubbi čoahkkin dollojuvvui Kárášjogas miessemánu 22. b. 2001. Deaŧaleamos oktasaš ášši riikarájiid rastá lea oktasaš sámi giellabargu. Ráđis lea ovddasvástádus oktasaš sámi giellalávdegottis. Maiddái sámi dáidda- ja kulturbarggu lea dárbu ovttastahttit ja lea dárbu ovttas bargat riikarájiid rastá. Eará deaŧalaš áššit leat oahpahus, dutkan, duodji ja eará ealáhusdoaibma.
Sámi parlamentáralaš ráđi bargui gullet maiddái Barentsovttasbargu, Arktálaš ráđđi, Interreg ja ON eamiálbmotbargu. ON eamiálbmotbargu siskkilda maiddái barggu eamiálbmogiid dearvvasvuođain Máilmmi dearvvasvuođaorganisašuvnnas.
Presideanttaid gaskasaš čoahkkimat
Golmma sámedikki presideanttat dollet čoahkkimiid oktasaš áššiid birra dárbbu mielde. Dáin čoahkkimiin meannuduvvojit dakkár áššit main sámedikkiin leat oktasaš beroštumit.