-Mii leat bivdán fylkkadikki maŋidit dán ášši Romssa skuvlastruktuvrra birra boahtteáiggis, gitta Sámediggi ja buot beroštumit geaidda ášši guoská, leat buktán cealkámuša, ja gitta Sámediggi lea beassan váldit oktavuođa Ráđđehusain ja ságastallan vejolaš čovdosiid, lohká Sámedikki várrepresideanta Laila Susanne Vars.
Romssa fylkkadiggi galgá mearridit Romssa fylkkaplána 2010-2013 ja seamma čoahkkimis galgá mearridit skuvlastruktuvrra birra boahtteáiggis. Sámediggi lea ožžon fylkkaplána gulaskuddamii, ja oaidná ahte plána deattuha ovttasbarggu Sámedikkiin ja sámi oliid nannema servodatovdáneamis. Fylkkaplána dieđiha ahte galget hábmejuvvot modeallat movt joatkkaoahpahusa fálaldat buoremusat sáhttá organiserejuvvot ja movt dálá resurssaid sáhttá buoremus lágiin ávkkástallat vai šaddá kvalitehtalaš buorre oahpahus ja vai fálaldat šaddá viiddis , muhto fylkkaplánas ii čužžon mihkke skuvllaid oktiičaskimiid dahje heaittihemiid birra.
Čuohcá báikegottiide
Skuvllaid heaittiheapmi ii leat dušše fylkkapolitihkka, muhto maiddái guovllupolitihkka. Skuvllaid heaittiheami ferte geahččat viidát servodatperspektiivvas go dát čuohcá garrasit báikkálaš servodagaide ja sáhttá mielddisbuktit eretfárremiid, guhkit mátki skuvlii ohppiide, guovddáštahttin ja juohkásemiid gelbbolašvuođabirrasiin. Dát ášši čuohcá márkosámi birrasii, ja skuvlla lasseárvu servodahkii láivu. Go skuvla lea dehálaš oassi infrastruktuvrras sámi báikkálaš servodagas mii lea skuvllas, sáhttá heaittiheapmi mielddisbuktit heajos lassiváikkuhusaid.
-Boahtteáiggi skuvlastruktuvra Romssa joatkkaskuvllain lea mu mielas servodatplánen, ja lei galgat sáddejuvvot Sámediggái gulaskuddamii, lohká Sámedikki várrepresideanta Laila Susanne Vars.
Ekonomalaš hástalus
Sámedikkis lea ipmárdus dasa ahte fylkkadikkis leat stuora ekonomalaš hástalusat. Sámediggi lea váldán bajás ášši Ráđđehusain ja áigu bivdit suohkaniid ja fylkkasuohkaniid oažžut buoret rámmaeavttuid vuođđooahpahusas sámegillii ja sámi gielas, ja sámi birra, guovllupolitihkalaš váikkuhangaskaoapmin.
- Fylkkasuohkanis ja Sámedikkis lea ovttasbargošiehtadus ja mun in sáhte oaidnit ahte heaittiheami gažaldat lea guorahallojuvvon geatnegasvuođaid mielde mat fylkkadikkis leat dán ovttasbargošiehtadusa ektui, lohká Sámedikki várrepresideanta Laila Susanne Vars.
Čoahkkimis šattai ovttamielalašvuohta dasa ahte geavahit šiehtadusa eanet aktiivvalaččat boahtteáiggis.