Árvvoštallan čájeha ahte dearvvašvuođa- ja sosiálabargiid gaskkas ipmárdus lea lassánan dasa ahte sámi giella- ja kulturipmárdus lea dehálaš go deaivvada sámi buhcciiguin.
Prošeavttat, maid Sámediggi lea ruohtadan, leat mielddisbuktán ođđa ja buoret fálaldagaid sámi buhcciide, ja maid bidjan johtui proseassaid mat leat mielddisbuktán eanet ipmárdusa sámi buhcciid dárbbuid birra.
-Dáinna lea Sámediggi hui duhtavaš, lohká Sámedikki várrepresideanta Laila Susanne Vars. Lea erenoamáš buorre ahte máhttu ja ipmárdus sámi giela birra lea lassánan eanemusat boarrásiiddivššus. Min boarrásiidda lea dát áibbas vealtameahttun, lohká Vars.
Ovttaárvosaš dearvvašvuohta
Váldomihttu Sámedikki áŋgiruššamis dearvvašvuođa ja sosiálasuorggis lea ovdánahttit ovttaárvosaš dearvvašvuođa ja sosiálabálvalusaid sámi álbmogii seamma eavttuid mielde go buot eará olbmuide.
Okta váikkuhangaskaomiin movt dán olahit, de lea Sámediggi 1999 rájis juolludan doarjagiid iešguđet lágan dearvvašvuođa ja sosiálaprošeavttaide miehtá Sámi.
Árvvoštallan čájeha ahte prošeavttain maid Sámediggi lea dorjon lea leamaš stuora ávki máhttui ja ipmárdussii sámi kultuvrra ja giela birra dearvvašvuođabálvalusas.
Ollu hástalusat
Árvvoštallan čájeha ahte Sámedikkis leat eanet hástalusat. Bohtosiid gaskkusteapmi dáin iešguđege prošeavttain ii leat doarvái buorre.
Árvvoštallan čájeha maid ahte julev- ja lullisámi guovlluin eai leat prošeavttat váikkuhan dasa ahte lea šaddan stuorit ipmárdus dearvvašvuođabálvalusaid ovdáneapmái mat váldet vuhtii sámi giela ja kultuvrra.
Árvvoštallan čájeha viidáset ahte prošeavttat eai leat váikkuhan dasa ahte ovddasvástideddjiid gaskkas bajit dásiin lea šaddan eanet fokus sámi buhcciid dárbbuide. Doppe leat eará áššit nugo Sámeláhka, sámi giela hálddašanguovlu, álgoálbmotriekti ja konsulterenvuoigatvuohta main lea leamaš stuorit beaktu.
Mii leat rievttes geainnu nalde
-Árvvoštallan lea buorre reaidu viidáset barggus buoridit dearvvašvuođafálaldaga sápmelaččaide, lohká Sámedikki várrepresideanta Laila Susanne Vars. Mii leat rievttes guvlui bargame, muhto mis leat ain ollu barggut mat eai leat čovdojuvvon. Ipmárdus dárbbuide ferte buoriduvvot julev- ja lullisámi guovlluin ovddasvástideaddji dearvvašvuođaeiseválddiin, lohká Vars.
Eanet resurssaid
Dearvvašvuođa ja sosiálasuorggi barggut leat hui resurssagáibideaddji barggut, ja Sámediggi lea dan sivas duhtavaš go dát árvvoštallanraportta maid čájeha Sámedikki ráddjejuvvon resurssaid dán barggus, loahpaha várrepresideanta.