Dán jagi sámi mánáidgárde- ja skuvlakonferánssas lágiduvvui Álttás skábmamánu 25. Ja 26. beaivvi. Konferánsa lea ovttasbargu gaskkal Romssa, Nordlándda ja Finnmárkku Fylkamánniid, Sámi allaskuvlla ja Sámedikki.
Ealáskahttin
Konferánssa fáddán lei sámegiella ja giela ealáskahttin. Konferánsii ledje boahtán oasseváldit miehtá Norgga, ja ledje maid oasseváldit geat bohte Ruotas. Konferánssas ledje lagabui 250 oasseváldi.
Giella ja giela geavaheapmi leat guovddáš áššit sámi mánáid ja nuoraid bajásšaddandilis, ja logaldallamat ja ságastallamat konferánssas čájehit ahte lea fáddá mas ollugat beroštit ja suorgi mas leat stuora hásttalusat.
Vuoruhit giela
Sámedikki várrepresideanta Laila Susanne Vars doalai sáhkavuoru Sámedikki ovddas, ja muitalii maid Sámediggi vuoruha dán áigodagas ja makkár doaimmat leat jođus.
Stáhtačálli Lisbeth Rugtvedt muitalii Ráđđehusa áŋgiruššámiid sámi mánáid ja nuoraid hárrái ja Sámi áššiid stáhtačálli Raimo Valle ovdanbuvttii Ráđđehusa barggu Sámegielaid doaibmaplána ektui.
Vuosttašamanuensa Marianne Storjord logaldalai iežas dutkama birra mas fáddán lea Kultuvrralaš oaivilhábmen sámi oahppan- ja ovddidanperspektiivvas.
Professor Kamil Øzerk ságastalai Giellaealáskahttin ja sátneriggodaga ovdáneapmi mánáidgárddi rájes joatkkaskuvlii. Son deattuhii man dehálaš lea hupmat mánáiguin unnivuođa rájes juo, vai sii šaddet sátneriggát.
Gielalaš oahppankafea
Konferánssa vuosttaš beaivvi lágiduvvui maiddái gielalaš oahppankafea. Vuhttui stuora beroštupmi ja áŋgirvuohta oasseváldiin ovddidit oainnuideaset dákkár kafeavuogi mielde.
Gárra rahčámušat
Konferánssa nuppi beaivvi lei guovddážis mánáidgárddiid ja skuvllaid árgabeaivi. Skuvllat ja mánáidgárddit ledje bovdejuvvon muitalit movt sii barget ovddidit giela ja giellageavaheami.
Álttá váhnenfierpmádat muitalii makkár rahčámušat sis leat leamaš oččodettiin sámi skuvlafáladaga mánáidasaset.
Konferánssas ledje maid oahpponeavvočájáhusat. Davvi Girji lágádus lei maiddái bovdejuvvon konferánsii muitalii veahá oahpponeavvobarggus, earret eará nuvttá oahpponeavvojuohkima birra.