Ovdanbuktin lea oassi Universal Periodic Review (UPR), gažadanortnet mii čađahuvvo ON olmmošvuoigatvuođaráđis buot ON mielláhttoriikkaiguin.
Norgga delegašuvnnas leat olgoriikkaministtar, Sámedikki várrepresideanta, Olgoriikkadepartemeantta ovddasteaddjit, Justis- ja politiijadepartemeanta, Bargo- ja searvadahttindepartemeanta, Mánáid- ja dásseárvodepartemeanta, Dearvvašvuođa- ja fuolahusdepartemeanta ja Máhttodepartemeanta.
-Lean hui duhtavaš dáinna rabas ja fátmmasteaddji proseassain mii lea leamaš ovdal UPR- gažadeami Geneves, mas Sámediggi lea leamaš mielde ráhkkaneamis. Lea maid buorre ovdagovvan Olgoriikkaministaris sadjet sáhkavuoru Sámediggái dán gažadeamis, lohká Sámedikki várrepresideanta Laila Susanne Vars.
-Sámediggái lea dehálaš deattuhit surggiid gos mii ovttas ráđđehusain sáhttit bargat eanet sihkkarastindihti našuvnnalaš čuovvoleami globála olmmošvuoigatvuođain. Mu sáhkavuorus áiggun earret eará bidjat guovddážii sámi gielaid hástalusaid, mearrasámiid vuoigatvuođaid ja skuvllaid heaittiheami sámi guovlluin, lohká Vars.
UPR- proseassa mielddisbuktá ahte juohke riikka hábme raportta olmmošvuoigatvuođaid čađaheami birra riikkas mii sáddejuvvo ON olmmošvuoigatvuođaráđđái.
Norgga raportta sáddejuvvui čakčamánu 8. b. dán jagi. Lassin Norgga našuvnnalaš raportii leat guokte dokumeanta vuođđun Norgga gažadeapmái; raporta mas leat almmolaš ja áššáiguoskevaš ON- dokumeanttat ja okta raportta mas leat dieđut ja rávvagat siviila servodagas.
Dás gávnnat dán golbma raportta mat leat vuođđun Norgga gažadeapmái.
http://www.ohchr.org/EN/HRBodies/UPR/PAGES/NOSession6.aspx
Dás beasat čuovvut Norgga gažadeami Olmmošvuoigatvuođaráđis gaskavahkku juovlamánu 2. b. 2009, dii 09.00 - 12.00.
http://www.un.org/webcast/unhrc/index.asp