Son deattuha ahte Sámediggi lea duhtavaš ráđđehusa lohpádusain čuovvolit Riddoguolástuslávdegotti 2008 raportta, muhto namuha seammás mávssolašvuođa dohkkehit mearrasámiid rivttiid mearraresurssaide sámi riddoguovlluin.
Sihkkarastit vuoigatvuođaid
Muđui čujuhii Sámedikki várrepresideanta dáláš prosessii sihkkarastit sámiid vuoigatvuođaid sámi guovlluin lulábealde Finnmárkku.
- Mii sávvat jođánis proseassa ráđđehusa bealis mii sihkkarastá ahte sámit eat šat masse eatnamiid ja resurssaid dain guovlluin, celkkii Laila Susanne Vars sárdnestuolus.
Sámegiella
Várrepresideanta geavahii maiddái liibba bidjat beroštumi sámegillii ja sámi kultuvrii. Dan oktavuođas deattuhii son Sámedikki vuorjjášumi giliskuvllaid heaittihemiid oktavuođas sámi guovlluin, ja dearvvašvuođabálvalusa ja giddagasaid váilevaš máhtolašvuođa ektui sámegiela ja sámi kultuvrra birra.