Beanavuoddji Aila Emilie Sarre Varanger trekkhundklubb nammasaš searvvis ja bođuvaláštalli Martin Hanssen Lillevik Jægervatnet IL nammasaš searvvis oažžuba Sámedikki nuoraid valáštallanstipeandda jagis 2009.
Stipeanda lea 50 000 ru ja galgá movttiidahttit nuorra valáštalliid áŋgiruššat valáštallamiin.
-Buorit ovddasteaddjit
-Goappašat valáštallit geat oažžuba Sámedikki valáštallanstipeandda dán jagi leaba čájehan nana dáhtu áŋgiruššat valáštallamiin. Soai leaba čalmmustan iežaska hui positiivvalaččat iežaska valáštallansuorggis ja leaba buorit ovddasteaddjit valáštallamii ja sámi nuoraide, dadjá Sámediggeráđi lahttu Vibeke Larsen.
Finnmárkku beanavuodjimis mielde
Aila Emilie Sarre lea eret Máskejogas Deanus. Son lea vuodján beatnagiiguin dan rájes go lei 7 jagi boaris. Vaikko lea dušše 19 jahkásaš, de son lea čájehan hui buriid bohtosiid iežas valáštallamis. Son lei vuosttaš gearddi mielde earret eará Finnmárkku beanavuodjimis árat dán jagi. Beanavuodjin lea divrras valáštallansuorgi ja gáibida ollu áiggi. Go galgá bures birget dán valáštallansuorggis, de gáibida dat áŋgirvuođa ja issoras valáštallanilu.
Riikajoavkkus
Martin Hanssen Lillevik lea 16 jagi boaris ja lea eret Lenangsøyras Ivggus. Son bálkesta šleakka, skearru ja kuvlla, ja sáhttá čujuhit hui buriide bohtosiidda. Maŋimuš olahus lei NM-golli šleakkas iežas ahkeluohkás. Juo guokte jagi dassážii váldojuvvui son mielde Norgga bálkunriikasearvái.
19 stipeandaohcama
-Midjiide bohte oktiibuot 19 stipeandaohcama. Ohcamat bohte máŋggalágan valáštallansurggiin, ja ohccit čájehedje dáhtu áŋgiruššat valáštallamiin, ja erenoamážit čájehedje valáštallanilu. Dát ohcamat movttiidahttet Sámediggeráđi bargat viidáseappot sámi valáštallamiin, ja ii lean nu álki válljet dušše guoktása. Mii geavahit vejolašvuođa sávvat buot ohcciide lihku valáštallamiin, dadjá Larsen loahpas.