Sámedikkis lea rabas bistevaš virgi vuosttaškonsuleantan/ráđđeaddin mas lea álgin farggamusat. Bargobáikin lea okta Sámedikki kontorbáikkiin.
Virgi gullá dearvvašvuođa-, fuolahus- ja sosiálačumpii. Čumppe bargu lea ovdánahttit ja čuovvolit Sámedikki politihka dáin fágasurggiin. Virggi bargosuorgái gullá maiddái ovdánahttit ja čuovvolit Sámedikki váikkuhangaskaoapmepolitihka dán fágasuorggi siskkobealde. Virgái sáhttet biddjot eará barggut mat gullet Sámedikki doibmii.
Virgái ohcat olbmo geas lea relevánta oahppu universitehtas dahje allaskuvllas, vuosttažettiin master-/váldofágas ja dearvvašvuođa- ja/dahje sosiálasurggiin. Vásáhusat almmolaš hálddašeamis ja gelbbolašvuohta sámi servodatdiliin ja sámegielas deattuhuvvojit. Dasa lassin deattuhit buori fágamáhtu, ovttasbargo- ja gulahallannávccaid, čálalaš ovdanbuktinnávccaid, návccaid bargat iešheanalaččat ja ulbmillaččat ja bálvalusdáhtu.
Virgi lea biddjon virgekodii 1408 vuosttaškonsuleanta dahje 1434 ráđđeaddi, ohcci geas lea earenoamáš gelbbolašvuohta sáhttit árvvoštallat virgádit seniorráđđeaddin.
Eanet dieđuid virggi birra addet ossodatdirektevra Audhild Schanche, vuolitdirektevra Hege Fjellheim Sarre dahje vuolitdirektevra Hans Arild Holmestrand, tlf. 78 47 40 00.
Sámedikki hálddahus galgá nu bures go vejolaš speadjalastit álbmoga girjáivuođa. Bargiidpolitihkalaš ulbmilin lea juksat dássedis čoahkádusa agi ja sohkabeliid dáfus, ja rekrutteret olbmuid geain lea unnitlogu- ja álgoálbmotduogáš.
Sámediggi lea šiehtadan Čáhkkilis bargodili, dg. Inkluderende Arbeidsliv (IA), ja deattuha bargodiliid láhčima juohke bargái.
Buohkain geat ásset Finnmárkkus ja Davvi-Romssas lea vejolašvuohta oažžut oaniduvvot oahppoloana Stáhta loatnakássas 10 proseanttain jahkái gitta 25 000 ru rádjai, sii ožžot maiddái sierra vearrogessosa ja lassi mánáidoaju. Dát gustojit dassážiigo Stuorradiggi rievdada dáid ortnegiid.
Sámedikki bargiin lea máškidis bargoáigi. Ohccit geat eai hálddaš sámegiela go biddjojuvvojit virgái, sáhttet ovttasráđiid bargoaddiin geatnegahttojuvvot váldit oahpu sámegielas.
Muđui virgáduvvojit bargit gustojeaddji lágaid, njuolggadusaid ja šiehtadusaid vuođul, dás maiddái bálká ja penšuvdna, ja 6 mánu geahččalanáigi. Bálkkás gessojuvvo 2 % Stáhta penšuvdnakássii.
Ođđa almmolašvuođalága vuođul sáhttet ohccidieđut almmuhuvvot vaikko ohcci lea bivdán ahte son ii galgga čállojuvvot ohcciidlistui.
Ohcanáigemearri: 08.01.2010
Virgeohcan sáddejuvvo min digitála ohcanguovddážii: http://e-skjema.no/sametinget.
Mii bivdit ohcciid almmuhit virggi referánsanummira: 09/4922.
Duođaštuvvon skuvla- ja bargoduođaštusaid máŋgosat biddjojuvvojit mielddusin dahje sáddejuvvojit bábirveršuvdnan: Sámediggi - Sametinget, Ávjovárgeaidnu 50, 9730 Kárášjohka/Karasjok