Nammaduvvon lahtut ja várrelahtut leat:
Johan Vasara, Guovdageaidnu - várrelahttu John Asle Boine Somby, Unjárga.
Siw Kristin Johnsen, Loabát - várrelahttu Kristina Torbergsen, Skiervá.
Karen Marit Siri, Romsa - várrelahttu Ailo Kemi Gjerpe, Kárášjohka.
Mats Jonas Pavall, Fuoisku - várrelahttu Sandra Nystø Ráhka, Divttasvuotna.
Sagka Danielsen, Brekken - várrelahttu Anja Labj, Plassje/Røros.
Sámedikki nuoraidpolitihkalaš lávdegoddi nammada ieš nubbinjođiheaddji lávdegoddái.
-Sámediggeráđi bealis leat mii hui ilus go mis leat nu olu čeahpes, servvodatberošteaddji nuorat Sámis. Daid máŋggaid evttohusaid gaskkas leat mii válljen nuoraid geat gullet iešguđet guovlluide ja geat leat iešguđetládje čájehan ahte sii leat buorit ovddasteaddjit sápmelaččaide olles riikkas, dadjá Sámedikki várrepresideanta Laila Susanne Vars.
Sámedikki nuoraidpolitihkalaš lávdegoddi (SNPL) galgá bargat iešheanalaččat ja ovddidit Sámediggái áššiid mat sámenuoraid mielas leat áigeguovdilat ja maid Sámediggi berre gieđahallat.
Lávdegotti jođiheaddjin lea ráđđi válljen Guovdageaidnulačča Johan Vasara. Son galgá doaibmat jođiheaddjin gitta 31.12.2011 rádjai.
-Sámedikki nuoraidpolitihkalaš lávdegotti lahtuid searvvis leat sámi servodaga boahttevaš jođiheaddjit ja ofelaččat. Lávdegoddi leage ávkkálaš nuoraide geat háliidit joatkit politihkalaš bargguiguin. Mii Sámediggeráđis sávvat lihku Sámedikki nuoraidpolitihkalaš lávdegoddái sin dehálaš bargui, dadjá Sámedikki várrepresideanta Laila Susanne Vars, gii lea lávdegotti bissovaš oktavuođaolmmoš Sámediggeráđis.