Čuovvolan dihte Stuorradikki mearrádusa nammadii Birasgáhttendepartemeanta geassemánu 6. b. 2008 viidát čohkkejuvvon lávdegotti, mii oaččui bargun čielggadit evttohusa movt báikkálaččat hálddašit joga guolleresurssaid. Deanujogalávdegoddái nammaduvvojedje Reidar Varsi, Edvard Nordsletta, Ingrid Nordal, Karl-Arne Larsson, Frank Martin Ingilæ, Kjell Harald Sæther, Audhild Schanche ja Heidi Ekstrøm.
Ovttajienalaš mearrádus
Deanujogalávdegoddi attii raporttas juovlamánu 3. b. 2009 ja ovddidii dalle ovttajienalaš evttohusa das movt báikkálaččat hálddašit Deanujoga guolleresurssaid. Lávdegotti váldoevttohus lea ahte ásahuvvo báikkálaš hálddašanorgána - Deanujoga guolástushálddašeapmi - mii galgá váldit badjelasas ovddasvástádusa ja doaimmaid mat dál gullet stáhtalaš eiseválddiide. Deaŧaleamos doaibman leat organiseret guolástusa, fuolahit dohkálaš bivdobearráigeahču ja hálddašit dietnasiid mat bohtet bivdokoarttaid vuovdimis.
Deanujoga guolástushálddašeapmi galgá maiddái fuolahit guhkes áigge badjel guolleresurssaid suodjaleami ja searvat ovttasbargui Suomain joga hálddašeami hárrái.
Oassin barggus lea lávdegoddi maiddái ságastallan luossanáliid suorggahahtti dili birra Deanujogas. Lávdegoddi lea viidát ovttamielalaš das ahte lea dárbu sihkkarastit eanet ceavzilis bivddu, ja ahte soahpamuš mii lea Norgga ja Suoma gaskka galgá jođáneamos lági mielde ođasmahttojuvvot ovdagihtii várrugas-lagadeami ektui go guoská luossabivdui.
Gulaskuddanreivve ollislaččat sáhttá lohkat dákko.
Gáldu: Birasgáhttendepartemeanta