2009:s leat Sámedikkis, Innovašuvdna Norggas ja Finnmárkku fylkkamánnis leamaš máŋga čoahkkima boanddaiguin gos leat ságastallan maid fertešii bargat sihkkarastin dihte eanadoalu Sis-Finnmárkkus. Bealit leat ovttamielalaččat das ahte láhčit diliid birgenvejolaš eanadoalu várás.
Porsáŋggu, Guovdageainnu ja Kárášjoga gielddain lea mielkegusaid lohku njiedjan 23 %:in jagi 2003 rájes jagi 2009 rádjai, go fas Finnmárkkus ja muđui riikkas lea dát lohku njiedjan 7-8 %.
Eanemusat lea njiedjan Kárášjogas 34 %:in. Sávzadoaluid lohku fas lea njiedjan 42 %:in, ja muđui Finnmárkkus lea njiedjan leamaš 9 %.
Danne leat Sámedikki ovttasbargobealit bovden dán golbma gieldda čoahkkimii ođđajagimánu 6. b. 2010 Sámediggái, ságastallat movt sáhtášii jorgalahttit dán negatiivvalaš ovdáneami.
Gielddain dat lea ovddasvástádus láhčit diliid ealáhusovddideapmái. Sámediggi áigu searvat dán ovddasmanni prošeavtta oasseruhtadeapmái ja gielddat ožžot fálaldaga čađahit dan.
Jos dáinna ovddasmanni prošeavttain lihkostuvvat, de áigu Sámediggi árvvoštallat ahte sáhtášii go sullasaš prošeavttaid čađahit eará guovlluin ge gos leat seammalágan hástalusat.
Čoahkkin álgá gáskaváhku 06.01.2010 dii.12.00 Sámedikkis. Preassa bovdejuvvo čoahkkimii.
Ráđđelahttu Marianne Balto oasálastá čoahkkima.