Sámedikki váldoulbmilin lea váikkuhit dásseárvosaš dearvvašvuođa- ja sosiálabálvalusa sámi álbmoga várás nugo muđui álbmogis lea. Danne lea deaŧalaš ahte dát boahtá ovdan doaibmabidjandokumeanttain regionála dearvvašvuođadoaimmahagaide.
Giella ja kultuvra galgá vuhtii váldojuvvot
Sámediggi lea ožžon muhtun sámi pasieanttain dieđuid ahte lea váttis gulahallat dearvvašvuođabargiiguin, ja ahte gallii ii leat vejolašvuohta geavahit sámegiela.
-Danne lea Sámediggi hui movtta go Dearvvašvuohta Davvin lea ožžon bargun čađahit dulkaprošeavtta buoridan dihte dulkabálvalusa sámi álbmoga várás, dadjá Sámedikki presideanta Egil Olli.
Dán jagi leat dearvvašvuođadoaimmahagat maiddái biddjojuvvon fuolahit ahte doaimmahagaid oahpahusfálaldat birgehallat dávddaiguin dahje doaibmavádjitvuođain lea heivehuvvon pasieanttaide geain lea sámi giella- ja kulturduogáš.
-Oahpahusoktavuođain lea áibbas dárbbašlaš ahte dearvvašvuođabargit sáhttet gulahallat pasieanttaiguin sin iežaset gillii. Danne háliida Sámediggi ahte doaimmahagaid doaibmadokumeanttain erenoamážit dat biddjojuvvo guovddážii, dadjá Sámedikki presideanta Egil Olli.
Spesialistadearvvašvuođabálvalusat
-Ollu stuorra doaimmat galget čovdojuvvot dearvvašvuođa siskkobealde oppalaččat, ja dál biddjojuvvo hui guovddážii seastin ja dat ahte beaktileamos vugiin geavahit dearvvašvuođaruđaid. Sámedikki mielas lea hui deaŧalaš ahte daid fálaldagaid maid mii leat nagodan oažžut sámi pasieanttaide ain galgá leat vejolašvuohta ovdánahttit viidáseappot buoremus ávkin sámi pasieanttaide, dadjá Olli.
-Mii háliidit čuovvut dárkilet ovdáneami, ja danne leat bivdán ahte Dearvvašvuohta Davvin ain ruhtadivččii Sámi našuvnnalaš gealboguovddáža - psykálaš dearvvašvuohta (SANKS) ja daid ruđaid birra mat addojuvvojit našuvnnalaš gealboguovddáža geavahussii raporterejuvvo sierra, dadjá Olli loahpas.